Nga Braçe te Vokshi, kush janë deputetët më efikas në Kuvend
Më joaktivët, Rakipi, Rehovica dhe ish- ministri Tahiri
Deputetët e Kuvendit të Shqipërisë, pavarësisht se kanë të drejtë të propozojnë ligje, të bëjnë amendamente në ligjet ekzistuese apo të kërkojnë interpelanca me ministrat, preferojnë të qëndrojnë pasivë, duke kërkuar gjithnjë e më rrallë fjalën në seancat plenare.
Efikasiteti i punës së deputetëve, që nga koha kur ata kanë marrë mandatin nga KQZ- ja dhe deri në muajin dhjetor, ka qenë objekt i një studimi të Institutit të Studimeve Politike, i cili ka marrë në analizë secilin deputet dhe ka vlerësuar performancën e tij. Sipas të dhënave të siguruara nga ky studim, në pjesën më të madhe, ligjet në Kuvend nuk janë iniciativë e vetë ligjvënësve, por janë të depozituara në emër të grupeve parlamentare në të cilat ata bëjnë pjesë. Po ashtu, në listë nuk janë përfshirë tri emra, kryetari i Kuvendit Gramoz Ruçi, Kryeministri Edi Rama dhe kryetari i PDsë Lulzim Basha, për shkak të funksionit të tyre, si dhe nuk janë përfshirë ministrat deputetë, për shkak të natyrës së veçantë të aktivitetit ekzekutiv dhe parlamentar. Aktualisht, kemi një numër të madh deputetësh që kanë paraqitur nisma ligjore në emër të partisë, pra, janë përzgjedhur nga drejtuesit e grupit për të paraqitur amendime, siç kemi deputetë që e kanë ushtruar këtë të drejtë pa orientim partiak, por si nismë personale. Nga të dhënat e studimit, rezulton se më efektivë në punën e deputetit në Kuvend rezultojnë ligjvënës me përvojë parlamentare, që njohin mirë rregulloren, kompetencat, praktikat e punës dhe që i shfrytëzojnë ato pozitivisht në funksion të punës së tyre. Bazuar në këto të dhëna, rezulton se deputetët me efektivitet më të lartë gjatë periudhës shtator- dhjetor 2017 janë Erion Braçe ( PS), Albana Vokshi e Jorida Tabaku ( PD), ndjekur nga Petrit Vasili ( LSI), Taulant Balla e Ermonela Felaj ( PS), Luçiano Boçi, Edmond Spaho e Romeo Gurakuqi ( PD). Me treguesin më negativ rezultojnë të jenë dy deputetët, që humbën mandatin në kuadër të dekriminalizimit, Aqif Rakipi( PDIU) dhe Gledion Rehovica( LSI) dhe përpara tyre, “të heshturit” në Parlament, si dhe ish- ministri Saimir Tahiri. Pavarësisht se janë shpeshherë aktivë në seancat plenare, Berisha e Kryemadhi nuk kryesojnë listën e deputetëve me efikasitetin më të lartë për disa arsye. Kryetarja e LSI- së, Monika Kryemadhi, nuk merr pjesë asnjëherë në komisione dhe as diskuton ose propozon ligje aty, ndërkohë që Berisha ka qenë objekt edhe i penalizimit me përjashtim 10- ditor nga seancat e komisionet parlamentare. Skema, sipas të cilës janë vlerësuar deputetët e Kuvendit, përcakton me pikë çdo veprimtari të ligjvënësit në periudhën shtator- dhjetor 2017. Kështu nisma ligjore 10 pikë, amendimet ligjore 10 pikë, interpelancat 10 pikë, votimi i ligjeve 10 pikë, pyetje adresuar institucioneve 10 pikë, aktiviteti publik 10 pikë, fjalime dhe angazhime në seancë 20 pikë dhe diskutim e angazhim në komisionet parlamentare 20 pikë, pra në total 100 pikë), por edhe duke bërë vlerësimin zbritës negativ ( përjashtim nga seancat ose komisionet – 10 pikë, heqje imuniteti apo abuzime financiare në deklarim e përfitim nga - 20 pikë, si dhe heqje mandati - 20 pikë, në total - 100 pikë) ka krijuar për herë të parë një standard vlerësimi pozitiv e negativ për punën e deputetëve.