Bllokimi i Gjykatës Speciale debatohet të mërkurën në Kosovë
Shfuqizimi i Ligjit për Gjykatën Speciale rikthehet të mërkurën në rend dite në Kuvendin e Kosovës. Në këtë mbledhje, pritet të vendoset nëse do të procedohet projektligji për shfuqizimin e ligjit për Dhomat e Specializuara dhe Zyrën e Prokurorit Special. Deri tani, nga lista e 43 deputetëve, nënshkrues të iniciativës, vetëm dy prej tyre janë tërhequr, një i AKR- së dhe një i Nismës. Përpjekjet për të bllokuar gjykatën speciale janë dënuar shumë nga ndërkombëtarët. BE- ja dhe SHBA- ja kanë paralajmëruar se marrëdhëniet e Kosovës nuk do të jenë më të njëjtat me ta, nëse vendoset të bllokohet Gjykata Speciale, e kërkuar nga ndërkombëtarët për të gjykuar luftëtarët e Ushtrisë Çlirimtare në Kosovë, një vendim që duket se do të prekë edhe shumë politikanë të Kosovës, të cilët janë ngjitur në majë të jetës politike dhe ekonomike në Kosovë pasi kanë dalë nga UÇK- ja. Shefi i Grupit Parlamentar të PDK- së, Memli Krasniqi, nuk ka dashur ta komentojë këtë çështje. Edhe pse përkundër deklaratave të liderit të kësaj partie, Kadri Veseli, i cili i premtoi ambasadorit amerikan në Kosovë se Gjykata Speciale nuk do të zhbëhej, megjithëse më parë ai e kishte përkrahur këtë vendim, deputetët janë të pavendosur. AAK- ja e kryeministrit Ramush Haradinaj, vazhdon të mbajë qëndrim të njëjtë, me gjithë kritikat e shumta për këtë të zyrtarëve ndërkombëtarë e përfaqësuesve diplomatikë në Prishtinë. Deputetë të kësaj partie janë shprehur se nuk do të tërhiqen deri kur këtë hap ta hedhin nismëtarët e këtij projektligji. Ndërsa, deputetët e minoriteteve që dhanë nënshkrimet e tyre për të shfuqizuar Specialen, thonë se vendimi i tyre do të jetë i njëjtë me partnerët e koalicionit qeverisës. Deri tani, Vetëvendosje dhe Lidhja Demokratike e Kosovës, janë shprehur kundër nismës për ta shfuqizuar ligjin për Dhomat e Specializuara dhe Zyrën e Prokurorit të Specializuar.