Perez kërkon Nejmarin, ofron Ronaldon plus parà

Në futbollin e sotëm, asgjë nuk është e pamundur dhe këtë e konfirmoi edhe largimi i Nejmarit nga Barcelona. Më shumë sesa për 222 milionë eurot e klauzolës, ishte fakti që braziliani hoqi dorë nga mundësia për të luajtur me Lionel Mesin, për të qenë lideri i padiskutueshëm në Paris, por çmenduritë, ndoshta nuk kanë përfunduar ende. Ajo e radhës mund t'i përkasë merkatos së verës sepse nga Spanja, zërat e fundit që shohin presidentin e Realit të Madridit, Florentino Perezin, të "dashuruar" me Nejmarin, po marrin çdo ditë e më shumë konfirmime. Madje, "bombës" pritet t'i hiqet vetëm siguresa që të shpërthejë sepse thashethemet e fundit flasin për diçka që deri një muaj më parë, dukej e pamenduar. Florentino Perez është gati që të heqë dorë nga Kristiano Ronaldo vetëm për të pasur në skuadrën e tij Nejmarin. Madje, çmenduria shkon edhe më tej, sepse numri një i Realit të Madridit është gati që, përveç kartonit të yllit portugez, është gati që t'iu garantojë francezëve edhe një shumë të konsiderueshme parash për ta mbyllur pa probleme tratativën. Normalisht që nga ana e saj PSG- ja do ta mirëpriste Kristiano Ronaldon, sepse "CR7" është jo vetëm një kampion, por edhe një industri marketingu. Duke lënë mënjanë pagat, që pa dyshim do të jenë stratosferike, nëse ky shkëmbim bëhet, i vetmi "hendikap" lidhet me moshën. Ronaldo do të festojë më 5 shkurt 33 vjetorin, ndërsa Nejmar e ka të gjithë karrierën e tij përpara, duke qenë se në të njëjtën ditë me Kristianon, gjithashtu më 5 shkurt, do të festojë 26- vjetorin. Ky është i vetmi aspekt që mund të ndalojë PSG- në të pranojë ofertën e Perezit: Ronaldon plus parà për Nejmarin... Gjithsesi, diçka më e qartë do të kuptohet më 14 shkurt ( ose më 6 mars), kur Reali i Madridit dhe PSG- ja do të përballen mes tyre për 1/ 8- at e Ligës së Kampioneve.