Ngrin dëmshpërblimi për të përndjekurit, trashëgimtarët që s’do marrin paratë
NDRYSHIMET LIGJORE, KATEGORITE QE MUND TE PERJASHTOHEN
Ministri i Financave dhe Ekonomisë, Arben Ahmetaj, deklaroi dje se qeveria është duke diskutuar mënyrën se si do të dëmshpërblejë trashëgimtarët e ish- të përndjekurve.
Ministri Ahmetaj sqaroi se qeveria po shqyrton nëse do të shlyhen të gjithë trashëgimtarët e ish- të përndjekurve apo do të ketë kufizime. Deklaratat, kreu i Financave Arben Ahmetaj i bëri gjatë konferencës për shtyp për të dhënat ekonomike të vitit 2017. “Qeveria ka një këndvështrim të ri që do t’ia paraqesë Parlamentit për përfituesit trashëgimtarë. Pra, ka një debat midis logjikës së kush përfiton. Është një debat i shëndetshëm. Pra, përfitojnë vetëm trashëgimtarët e rreshtit të parë, apo nuk përfitojnë më trashëgimtarët, si te veteranët e luftës. Te veteranët e luftës nuk përfiton asnjë trashëgimtar më. Ka një debat të shëndetshëm, i cili shkon patjetër edhe në drejtimin e duhur me të drejtën që kanë përfituesit parësorë dhe pastaj logjikën që do të përdorim për trashëgimtarët e niveleve të ndryshme, sepse ka trashëgimtarë që kanë vuajtur për nënën, babain në përndjekje politike dhe pasojat, por sigurisht që ka trashëgimtarë të nivelit të dytë apo të tretë, që patjetër nuk kanë vuajtur njësoj”, tha Ahmetaj.
FONDI
Ministri i Financave, Arben Ahmetaj, tha se fondi për dëmshpërblimin e trashëgimtarëve të ish- të përndjekurve ka ngrirë deri në momentin që do të vendoset se kush do të përfitojë. “Deri në një vendimmarrje, ai fond për përfituesit trashëgimtarë ka ngrirë, deri në një moment kur ne të kemi qartë politikën. Pra, do të shlyejmë këste të të gjithë trashëgimtarëve, pra, nuk ka ndonjë rëndësi brezi i parë, brezi i dytë, i tretë apo i katërt, apo do të kufizohemi”, u shpreh Ahmetaj.
ISH- TË PËRNDJEKURIT
Ministri i Financave, Arben Ahmetaj, tha se qeveria ka shlyer të gjithë dëmshpërblimin e ish- të përndjekurve, që janë gjallë. Ish- të përndjekurit që përfitojnë këstin e tetë, por për shkak të mangësive të dosjeve apo mosparaqitjes së personave, ministri i Financave garantoi se dëmshpërblimi do të tërhiqet brenda 3- mujorit të 2018- s. “Qeveria i pagoi të gjitha këstet ndaj ish- të përndjekurve, në respekt të asaj vuajtjeje që kanë kaluar, të teta këstet. Në total, është miratuar një fond prej 8.15 miliardë, gati 80 milionë dollarë dhe janë disbursuar 8.07 miliardë lekë. Pra, kemi përfunduar këstin e tetë me për- jashtime shumë të vogla, numra shumë të pakonsiderueshëm, për shkak të mosparaqitjes së personave për të rregulluar dokumentacionin apo për të diskutuar me administratën për ato probleme që duhen qartësuar në dosjet e tyre. Kemi mbaruar këstin e tetë brenda 2017s. E theksoj, për hir të transparencës dhe të vërtetës që kanë mbetur numra të vegjël ende pa paguar për shkak të dosjeve dhe ato do të paguhen brenda maksimumi tremujorit të parë”, përfundoi ministri Ahmetaj.