Kuvendi nis me sherr, opozita kërkon ndryshim të Kushtetutës për Arta Markun
Garda ndërhyn sërish në sallë, kreu i Kuvendit i kthehet Bashës: Mos bëj bodigardin e kryetarit të Grupit. Bëhu lider i opozitës
Seanca e parë e Parlamentit për legjislaturën e 9- të është shoqëruar me debate dhe me tensione. Edhe pse duhet të ishte një seancë formale, ajo u shoqërua me tone të larta për shkak të amendamentit kushtetues, që opozita kërkoi të futet në programin e punës së Parlamentit. Amendamenti kushtetues, i firmosur nga 55 deputetët e Partisë Demokratike dhe Lëvizjes Socialiste për Integrim synon që të shkarkojë Kryeprokuroren aktuale dhe të zgjedhë një Prokuror të ri të Përgjithshëm të Përkohshëm me 3/ 5 e votave. Deputetët e PD- së e kanë quajtur si shkelje të rëndë kushtetuese zgjedhjen e Arta Markut me 69 vota në seancën e 18 dhjetorit dhe, për këtë arsye, kanë kërkuar që të rivendoset kushtetutshmëria. Por, gjatë seancës, palët janë përplasur sërish. Pas fjalës së krerëve të grupeve parlamentare, Edmond Spaho kërkoi fjalën për procedurë për të sqaruar propozimin e PD- së, por Gramoz Ruçi ia ka prerë fjalën duke i thënë se do e lejonte ta bënte sqarimin në fund të seancës. Por ndërprerja e fjalës shkaktoi irritimin e opozitës. Kryetari i PD- së dhe deputetët e tjerë kanë rrethuar foltoren duke i kërkuar Ruçit që t'i japë fjalën Spahos. Por Ruçi i ka bërë thirrje të ulen, duke i kërkuar të zbatojnë rregulloren. Ruçi i ka kërkuar Bashës që të sillet si lider në Parlament dhe të mos bëjë rolin e bodigardit të Edmond Spahos. Por kreu i PD- së ka kërkuar që të zbatohet rregullorja. "Mos na fol këtu sikur je mbret i kësaj salle, ka rregullore, ka Kushtetutë. Ti do futësh amendamentin kushtetues", iu drejtua Basha Ruçit. Por pasi u bë rreth një orë debat për këtë çështje, kreu i Kuvendit iu drejtuar pakicës duke i konfirmuar se propozimi i tyre kishte hyrë automatikisht në programin e Kuvendit dhe se debati ishte i kotë. "Propozimin tuaj e ka futur automatikisht rregullorja në programin e Kuvendit që në momentin që është depozituar. Pse ziheni për këtë çështje", iu drejtua Ruçi demokratëve.