Arta Marku flet për shkarkimet: Do të ketë surpriza
Kryeprokurorja paralajmëron lëvizje të tjera në organin e akuzës
Ndryshimet në organin e akuzës do të vazhdojnë dhe do të ketë “surpriza”. Kështu është shprehur Kryeprokurorja e Përkohshme Arta Marku në një takim ditën e djeshme me gazetarët. Marku, e cila nuk ka folur më parë për shkarkimet në Prokurori, la të kuptojë se ky proces ndryshimesh do të vijojë në organin e akuzës. Ajo gjithashtu tha se nuk do t’i thoshte “jo” një kandidimi për Kryeprokuror të Përgjithshëm, i cili ka një mandat 7- vjeçar. Takimi me gazetarët u zhvillua në Prokurorinë e Përgjithshme ditën e djeshme, në orën 10: 00. Kryeprokurorja e Përkohshme u kujdes që të mos japë komente në lidhje me mënyrën se si ajo u betua në Parlament, ku opozita hodhi flakadanë. Për atë episod, Marku tha se do të përgjigjet një herë tjetër. Lidhur me tensionet brenda Prokurorisë që pas largimit të Adriatik Llallës, ku dy drejtues janë shkarkuar prej saj, Marku tha se këto konflikte nuk janë nxitur prej saj. Ajo tha se ata që u larguan janë në dijeni të arsyeve të largimit. Para gazetarëve, Prokurorja e Përgjithshme e Përkohshme garantoi se organi i akuzës do të jetë i hapur dhe i lirshëm për median. “Misioni ynë është i përbashkët, ndonëse kalon në rrugë të ndryshme: Prokuroria, për të luftuar krimin në tërësi, krimin e organizuar, trafiqet dhe korrupsionin dhe media për të shpalosur, jo vetëm mangësitë dhe problematikat, por edhe përpjekjet për një luftë kundër të gjitha formave të veprimtarisë kriminale. Bashkëpunimi me median dhe qartazi përmes saj me publikun, është synim i Prokurorisë”, tha Marku. Që nga marrja e detyrës, Kryeprokurorja e Përkohshme ka bërë një sërë ndryshimesh në krerët e Prokurorive në rrethe. Deri më tani, është shkarkuar Kryeprokurori i Tiranës, Durrësit, Elbasanit, Kukësit dhe Fierit. Ndryshime ka patur edhe brenda Prokurorisë së Përgjithshme. Megjithatë, këto lëvizje janë sulmuar dhe ish- kreu i Prokurorisë së Elbasanit dhe ish- drejtorja e Drejtorisë së Marrëdhënieve Juridiksionale me Jashtë, kanë bërë padi në Gjykatën Adminis- trative për shkarkimet e tyre. Madje, prokurori Gina, që drejtonte Prokurorinë e Elbasanit, e ka kallëzuar edhe penalisht Arta Markun për shpërdorim detyre në Prokurorinë e Krimeve të Rënda. Krerët e tjerë të prokurorive në rrethe që u shkarkuan, kanë qenë të komanduar nga Llalla, përveç atij të Durrësit, i cili u transferua në Pukë. Pas lëvizjeve ka nisur edhe një debat lidhur me kompetencat e Kryeprokurores së Përkohshme, nëse duhet ose jo të shkarkojë apo riorganizojë strukturat e organit të akuzës.