Dokumenti sekret në ‘ 91 i Sigurimit, Azem Hajdari letër vëllait: Po humba zgjedhjet do iki në SHBA
ZBULOHET LETRA E PANJOHUR E LIDERIT TE DHJETORIT PARA ZGJEDHJEVE TE 31 MARSIT: DO JEM PERBALLE RAMIZ ALISE
“Nëse nuk fitoj zgjedhjet, iki në Amerikë”. Azem Hajdari, duket se i kishte të qarta synimet e tij në fillim të karrierës së tij politike.
Në vitin 1991, Azem Hajdari ka qenë i survejuar nga ish- Sigurimi i Shtetit. Bashkëpunëtorët e Sigurimit depërtonin deri tek njerëzit më të afërt të të shenjëstruarit. Nga një dokument i deklasifikuar nga Autoritetit për Informimin mbi Dosjet e Ish- Sigurimit të Shtetit, shihet qartë se si funksiononte survejimi. Në këtë rast, bashkëpunëtori me pseudonimin “Lapsi”, kishte arritur të merrte të dhëna nga vetë vëllai i Azemit, Rasimi, i cili ishte Sekretar i Partisë Demokratike. Rasimi tregon për një letër që i vëllai ia dërgonte një shoku dhe mes të tjerash shkruante se do të zhvillonte një miting madhështor në Kosovë për të treguar fytyrën e vërtetë të Enver Hoxhës dhe Partisë së Punës së Shqipërisë, kundrejt çështjes së Kosovës. Po ashtu, Azemi flet për zgjedhjet e vitit 1991, në të cilat ai kandidonte për PD- në, përballë Ramiz Alisë. Hajdari i beson shokut të vet se nëse nuk do të fitojë zgjedhjet, do të largohet nga Shqipëria për në Amerikë, ku i kishin sig- uruar jetën dhe shkollimin në Fakultetin e Mbrojtjes së të drejtave të njeriut.
Pas këtij informacioni, që konsiderohet me vlerë dhe dëshmon për veprimtari “antikombëtare” dhe “antishtetërore”, vihen në lëvizje mekanizmat e Sigurimit të Shtetit për të sqaruar synimet e Azem Hajdarit. Përse ai duhet të organizonte një miting për të armiqësuar Kosovën me Shqipërinë dhe kush e mbështeste veprimtarinë e tij? Kush ia siguronte jetën dhe shkollimin?
Përveç ndjekjes së Hajdarit, dokumenti, që zbardhet i plotë më poshtë, dësh- mon edhe për mosbesimin që ekzistonte mes vetë bashkëpunëtorëve të Sigurimit. Operativi e konsideron të pabesueshëm “Lapsin”, ndaj edhe duheshin verifikuar të gjitha informacionet që ai ofronte, në rastin konkret duhej siguruar letra e Azemit, të fotokopjohej dhe të vërtetohej shkrimi.
Azem Hajdari është një nga figurat më të diskutuara të historisë së tranzicionit shqiptar. Herë i trajtuar si hero e herë të tjera si antihero. Më së fundi, rreth figurës së Azemit u debatua jo pak, pas vendosjes së shtatores së tij në qytetin e “Bajram Currit”. Ishte analisti Mustafa Nano, që do nxiste debatin me një shkrim të tijin, ku ndër të tjera thoshte se “Azem Hajdari ishte një njeri i zakonshëm. Shumë i zakonshëm. Me prerje e poza prej të forti. Me IQ të ulët”. Një shkrim që u pasua nga përgjigja e së bijës, Rudinës, dhe të tjerë mbrojtës të figurës së Hajdarit apo të “tezës” së Nanos.