PS refuzon opozitën: S’ka pakt të ri për Kushtetutën
Manja: Do vazhdojmë vetëm zgjedhjen e anëtarëve të KLGJ e KLP
Maxhoranca i ka mbyllur derën përfundimisht miratimit të amendamentit të Kushtetutës, të depozituar nga 55 deputetë të opozitës, me të cilin kërkon shkarkimin e Prokurores Arta Marku dhe çeljen e procedurës së zgjedhjes së prokurorit të ri, me 3/ 5 e votave.
Por për kryetarin e Komisionit të Ligjeve, Ulsi Manja, nuk do të ketë asnjë kompromis me opozitën në kurriz të Kushtetutës së vendit. Sipas Manjës, Kushtetuta aktuale është miratuar me 140 vota në Parlament dhe se Reforma në Drejtësi ka nisur të zbatohet. “Nuk ka dhe nuk do të ketë asnjë lloj kompromisi në kurriz të Kushtetutës së vendit, që e kemi miratuar bashkërisht dhe me vullnet të plotë me 140 vota, aq më tepër, kur në këtë proces të Reformës në sistemin e Drejtësisë, duke filluar që me ndryshimet kushtetuese dhe deri sot, kryetari i maxhorancës e ka bërë të qartë se nuk jemi vetëm. Vijërojtësit e kësaj reforme janë partnerët tanë, SHBA- të dhe BE- ja, nëpërmjet dy misioneve që asistojnë drejtësinë, EURALIUS- it dhe OPDATit”, tha dje Ulsi Manja.
NËNKOMISIONI Socialistët nuk i druhen dhe një bojkoti të mundshëm të opozitës në nënkomisionin e Ligjeve, i cili do të miratojë kandidaturat për Këshillin e Lartë të Prokurorisë dhe Këshillin e Lartë të Gjyqësorit. Sipas Ulsi Manjës, ky proces do të bëhet edhe pa opozitën, por ajo, sipas tij, është e mirëpritur të japë kontributin e saj. “Lidhur me ngritjen e këshillave, Kushtetuta dhe ligji është i qartë, sepse kushtetutëbërësi, në momentin e hartimit të këtyre ndryshimeve kushtetuese, ka qenë i qartë për të përcaktuar edhe mekanizmin e zhbllokimit, në rast se do të kishte bllokim politik në ngritjen e këtyre këshillave. Nënkomisioni adhoc mund ta vazhdojë dhe ta çojë deri në fund punën për ngritjen e këshillave dhe në finale, vendimmarrja i takon seancës plenare. Këtë thotë Kushtetuta, këtë e thotë edhe ligji, këtë do të bëjmë edhe ne. Por, opozita është e mirëpritur dhe jo vetëm e mirëpritur, madje, duhet të vijë të bëjë detyrën që i ngarkon Kushtetuta dhe ligji”, ka thënë dje Manja. Por maxhorancës do t’i duhet sërish vota e opozitës për të bëre 84 vota dhe për të miratuar nenet e reja, të cilat i ka rrëzuar Gjykata Kush- tetuese në ligjet për “organet e qeverisjes së sistemit të drejtësisë” dhe në ligjin “për statusin e gjyqtarëve dhe prokurorëve”. “Nëse opozita ka shqetësimin e reflektimit të këtyre vendimeve të Gjykatës Kushtetuese në këto dy ligje të rëndësishme, është e mirëpritur që të japë mbështetjen dhe vullnetin e duhur politik, që t’i adresojmë dhe t’i votojmë menjëherë”, ka thënë Manja.