Gjykata rrëzon Gashin për urdhrin e Markut
Avokati mbrojtës, Gjata: Shkarkimi dëmton Gashin në Veting
Gjykata Administrative në Tiranë refuzoi ditën e djeshme, kërkesën e prokurores Rovena Gashi, për të pezulluar urdhrin e Kryeprokurores së përkohshme, Arta Marku, për shkarkimin e saj nga detyra e drejtores së Marrëdhënieve me Jashtë në Prokurorinë e Përgjithshme. Në seancën e djeshme mori pjesë avokati i Gashit, Çlirim Gjata, i cili tha para Gjykatës së urdhri i Markut e penalizon Gashin përballë procesit të vetingut. Ai argumentoi se urdhri i Kryeprokurores për shkarkimin e Gashit nga detyra që mbante, është i paligjshëm për shkak të kompetencës dhe të mungesës së një motivacioni. Por Gjykata nuk pranoi kërkesën për pezullim të urdhrit deri në marrjen e vendimit të formës së prerë. Nga ana tjetër, përfaqësuesja ligjore e Kryeprokurores, Pranvera Gruda, tha se urdhri për shkarkimin nuk shkakton dëm te paditësja Gashi, pasi ajo vazhdon të kryejë detyrën e prokurores. Ndërsa, vetë gjyqtari i seancës vendosi të mos e pranojë kërkesën e Gashit, pasi, sipas tij, nuk provohet rreziku i dëmit, siç pretendon mbrojtja. Nga ana tjetër, pritet që të fillojë çështja e themelit për padinë e Gashit. “Ky urdhër në vetvete sjell një dëm të madh të pariparueshëm sepse prokurorja në fjalë, si gjithë prokurorët e Prokurorisë së Përgjithshme dhe personalitetet e drejtësisë, aktualisht janë në veting dhe ajo ka komunikimin me organet e vetingut, që është në proces kontrolli. Dhe imagjinoni tani, ajo është në proces kontrolli për gjithë punën e jetës së saj dhe tani del një urdhër lirimi nga detyra. Kjo vlen si një dëm i madh i pariparueshëm sepse do të ndikojë në organet e vetingut dhe do të ndikojë jashtëzakonisht shumë. Proceduralisht do ta ankimojmë këtë vendim, brenda pesë ditëve, që është dhe afati ligjor”, tha Gjata për mediat, në përfundim të seancës. Ish- drejtorja e Marrëdhënieve Juridksionale me Jashtë ka paditur disa ditë më parë Kryeprokuroren Marku për shkarkimin nga detyra, duke pretenduar se është bërë pa motivacion dhe jashtë orarit zyrtar të punës.