Ahmetaj, letër biznesit për shërbimet e reja që lehtësohen
“Nga janari, do të kryhen online pagesat e TVSH, kontributi i sigurimeve dhe mallrat e akcizës”
Ministri i Financave dhe Ekonomisë, Arben Ahmetaj, i është drejtuar dje biznesit me një letër të hapur, mbi avancimin e procesit të deregulimit, arritjet e deritanishme dhe shërbimet e reja që do të lehtësohen për sipërmarrjen brenda muajit janar.
Reforma për deregulimin nisi në muajin shtator dhe ministri i Financave, Ahmetaj, fton biznesin në proces konsultimi për shkëmbimin e mendimeve dhe opinioneve të thjeshtimit të procedurave, ofrimit të shërbimeve online dhe uljes së peshës së burokracisë në institucionet shtetërore, brenda 15 shkurtit 2018. “Qeveria shqiptare ka prezantuar prej muajsh një nga reformat kryesore të mandatit të dytë, me në fokus përmirësimin e shërbimeve publike për biznesin dhe qytetarin, uljen e peshës së burokracisë, thjeshtimin e procedurave, reduktimin e kohës dhe kostove si dhe ofrimin e shërbimeve të reja online. Nga 1 tetori, në bazë të Urdhrit të Ministrit të Financave dhe Ekonomisë nr. 101/ 1 “Për ofrimin e dokumenteve on- line”, 13 dokumente nuk kërkohen më nga qytetarët apo sipërmarrja, për asnjë shërbim të ofruar nga MFEja dhe institucionet e saj të varësisë. Këto dokumente gjenerohen nga zyrat përkatëse të ofrimit të shërbimeve përmes platformës elektronike e- Albania ose nëpërmjet ndërveprimit dhe komunikimit mes institucioneve. Propozimet tuaja, që mund të preken në funksion të thjeshtimit, eliminimit apo ofrimit online, si dhe për lejet, licencat dhe autorizimet që konsideroni se përbëjnë mbirregullim të tregut, janë më se të mirëpritura për t’u kthyer në një platformë të re dialogu dhe konsultimi mes nesh, shumë shpejt në një tryezë të përbashkët”, thuhet në letrën e ministrit Ahmetaj. SHËRBIMET E REJA Në letrën dërguar biznesit, Ministri i Financave, Arben Ahmetaj, thotë se bren- da muajit janar, biznesit do t’i ofrohen online shërbime të reja në tatime e dogana. Biznesi do të ketë mundësi të kryejë online 13 pagesa në tatime duke nisur që nga TVSH, kontributi i sigurimeve si dhe të porosisë online pullat e akcizës. “Në fazën e dytë të reformës, ne po avancojmë në dy korsi paralele, së pari reduktimi i numrit të lejeve, licencave dhe autorizimeve, të cilat përbëjnë mbirregullim të tregut, për të cilat është përgatitur tashmë paketa e plotë e ndryshimeve ligjore dhe së dyti, në bashkëpunim me Agjencinë Kombëtare të Shoqërisë së Informacionit, po punojmë për ofrimin e shërbimeve të reja online, që përfshijnë pagesat elektronike në tatime, autorizime të lëshuara nga Drejtoria e Përgjithshme e Doganave, leje të punës dhe vërtetime të zyrave të punës etj” – shkruan Ministri Ahmetaj në letrën dërguar biznesit.