REAGIMI I TIRANËS ZYRTARE
Zyrtarët në Tiranë kanë reaguar pas vrasjes së politikanit liberal serb në Veri të Kosovës, Oliver Ivanoviç, duke e dënuar ashpër këtë akt. Presidenti Ilir Meta tha se “Ky akt kriminal të mos ndikojë në procesin e rëndësishëm të dialogut midis Serbisë dhe Kosovës, proces i cili është shumë i rëndësishëm për të ardhmen europiane të të dy vendeve dhe për stabilitetin, paqen dhe sigurinë e rajonit tonë”, shkruan Meta. Ndërsa Kryeministri Edi Rama e cilësoi vrasjen e Ivanoviç një akt qëllimkeq, që synon nxitjen e urrejtjes dhe tensionit, “Keqardhje e thellë për tragjedinë e Oliver Ivanoviç; akt qëllimkeq që nxit urrejtje e tension. Përpjekjet për dialogun e paqen s’duhen ndalur! Duhen thelluar!”, shkruan Rama. Kreu i Partisë Demokratike, Lulzim Basha tha mbi vrasjen e Ivanoviç, se ky është një atentat ndaj jetës dhe synon të jetë një atentat ndaj proceseve të bashkëjetesës dhe të dialogut në Kosovë. “Trajtimi i ngjarjeve të tilla kërkon maturi dhe largpamësi nga çdo aktor i përfshirë në dialogun dhe procesin e paqësimit të Kosovës”, ka shkruar Basha. Ishkryeministri, Sali Berisha, tha se pas këtij akti të shëmtuar kriminal, “qëndrojnë organizata terroriste ultranacionaliste serbe te llojit Dora e Zezë, që janë organizuar këto vitet e fundit dhe kanë kryer akte të rënda kriminale”. Ndërsa ishkryeministri, Pandeli Majko, tha se vrasja e Ivanoviç, “vjen në favor të atyre, të cilët duan që marrëdhënia shqiptaroserbe të jetë një krizë favorizuese e interesave joeuropiane. Vrasja e Ivanoviç është një akt kundër shtetit të Kosovës dhe po aq antishqiptar”, shprehet ai.