Begaj me doping, reagon presidenti Gjoza: Është e pastër
Lajmet e fundit që vijnë nga Federata Shqiptare e Peshëngritjes, janë tronditëse. Sipas lajmit që u raportua dje, Romela Begaj, e cila vetëm një muaj më parë u shpall kampione bote, ka rezultuar pozitive me doping. Peshëngritësja shqiptare bëri një paraqitje dinjitoze në Botëror, që u zhvillua në SHBA, në dhjetor, dhe ku shënoi emrin me germa të arta në peshëngritjen shqiptare. Ajo u rendit e para në stilin e shkëputjes, duke fituar medalje ari. Kjo është hera e dytë që Romela Begaj rezulton pozi- tive në testet antidoping, pas asaj të vitit 2014.
ELEZ GJOZA
Presidenti i Federatës së Peshëngritjes, Elez Gjoza, është shprehur i shqetësuar nga situata! Ai ka deklaruar për "Panorama Sport", se ka bindjen se peshëngritësja Romela Begaj është e pastër dhe se kjo po bëhet që ajo të mos mbajë medaljen që nderoi Shqipërinë. "Ne ende nuk kemi marrë një përgjigje apo shkresë zyrtare nga Federata Botërore e Peshëngritjes! Jam i shqetësuar për lajmin që qarkullon edhe pse mund të ketë dalë nga burime të tjera dhe jo nga federata botërore! Jam i bindur se Romela është e pastër dhe ne do të bëjmë gjithçka për ta mbrojtur punën e saj! Do ta çojmë çështjen edhe në gjyq po qe nevoja", ka deklaruar Gjoza për gazetën! GAZMEND HAKCANI
Trajneri i peshëngritëses, Romela Begaj, Gazmend Hakcani, njëherësh edhe bashkëshorti i saj, ka thënë fjalën e tij pas skandalit ku Romela rezultoi pozitive me doping. Ai thotë se bashkëshortja e tij nuk ka përdorur asnjë substancë të ndaluar dhe se do të zhvillojë testin B. "Romela është e pastër dhe analizat janë të pastra. Kjo është diçka që bëhem me qëllim nga ndërkombëtarët. Kemi vendosur që të bëhet edhe testi B", deklaroi Hakcani. Kjo është hera e dytë që Romela Begaj del pozitive me stanozolol, teksa e njëjta situatë ka ndodhur edhe 4 vite më parë pas Botërorit të Kazakistanit. Tani, Begaj rrezikon 4 vite pezullim ose përjashtim përjetë nga sporti.