Kryemadhi: Protesta e 27 janarit paqësore, por Policia të mos provokojë
Kryetarja e Lëvizjes Socialiste për Integrim, Monika Kryemadhi, ka garantuar se protesta e opozitës më 27 janar, do të jetë paqësore, por i ka bërë thirrje Policisë së Shtetit të mos provokojë protestuesit. Në një bashkëbisedim me gazetarët, Kryemadhi ka kujtuar se opozita nuk do të kërkojë të prodhojë protesta si ajo që Edi Rama realizoi më 21 janar 2011. “Protesta e 27 Janarit do të jetë një protestë paqësore. Edhe pse ai kërkon t’ju blejë varfërinë me paratë e drogës, shpirtin nuk jua blen dot. Gjëja tjetër që dua të them në fakt, në imazhin e shqiptarëve është krijuar gjithmonë ideja e protestave të dhunshme, duke pasur parasysh që dhunën në protesta e solli z. Rama më 21 janar, i cili ishte shembulli më i keq për të treguar se si protestohet. Protesta e 18 dhjetorit ka qenë një protestë shumë paqësore. Në qoftë se flakadanët i quan bomba, gazlotsjellësi është çështje, nuk po them çështje botëkuptimi, por është çështje interpretimi dhe çështje informacioni. Mendoj që policia dhunoi disa gra dhe vajza, gjë që normalisht njerëzit i irritojnë. Dhuna nuk është nga njëra anë, dhuna vjen kush e provokon dhe Policia duhet të jetë shumë e kujdesshme për të mos provokuar qytetarët, sepse është shumë normale që, nëse prindërit e tyre do të shikojnë që fëmijët e tyre dhunohen në mënyrë të padrejtë nga policia, nuk ka prind që ta pranojë dhe ta suportojë”, deklaroi Kryemadhi. Kryetarja e LSI- së ka kujtuar se Shqipëria është një vend hibrid, nuk është vend demokratik. “Është midis diktaturës dhe uzurpimit të shtetit nga një organizatë e strukturuar kriminale, e cila është bërë çdo ditë e më shumë më e rrezikshme”, theksoi kryetarja e LSI- së.