Kushtetuesja rrëzon pa kuorum prokurorët
Gjykata Kushtetuese nuk ka arritur dot kuorumin e nevojshëm me 5 vota kundër kërkesës së Unionit të Prokurorëve. Gjykata Kushtetuese, e mbetur me 7 anëtarë, mori një vendim 4 me 3 për të rrëzuar kërkesën e Unionit. Por, që vendimi të quhet legjitim, duhen që minimalisht 5 gjyqtarë të jenë në një mendje. Unioni i Prokurorëve ankimoi si antikushtetues disa nene të “Kodit të Procedurës Penale” të ndryshuar, pjesë e paketës së Reformës në Drejtësi. Sipas Unionit të Prokurorëve cenon pavarësinë dhe atributet e Prokurorit, që ia garanton Kushtetua, duke i dhënë gjyqtarit atribute që Kushtetuta ia njeh Prokurorisë. Unioni kërkoi shfuqizimin e disa neneve, që sipas tyre, i jepnin gjykatës të drejtë kontrollimi e vendimmarrjeje në lidhje me çështjet penale kur ato janë ende në hetim në Prokurori. Më konkretisht, në nenin 329 të Kodit të ri të Procedurës parashikohet që prokurorët të konfirmojnë te gjyqtari i hetimeve paraprake vendimin e pushimit të akuzës ose të çështjes. Pra, çështja apo akuza pushohet vetëm nëse gjyqtari miraton vendimin e prokurorit, duke pasur mundësinë të prishë çdo vendim të marrë nga organi i akuzës. Në këtë aspekt, sipas unionit kjo është në shkelje të Kushtetutës, e cila njeh vetëm Prokurorinë si organ të ndjekjes penale. Drejtues të Unionit të Prokurorëve janë shprehur se me këtë vendim u lind e drejta, që kur të plotësohen vendet vakante në Gjykatën Kushtetuese ta ribëjnë edhe njëherë kërkesën me shpresën e miratimit, nga të paktën 5 anëtarë të trupës.