Anulimi i dëmshpërblimeve për të përndjekurit, Tabaku: Rama, njësoj si Enver Hoxha

Nënkryetarja e Komisionit të Ekonomisë, Jorida Tabaku, ka akuzuar Kryeministrin Rama se me vendimet e tij, po sillet njësoj si ish- diktatori Enver Hoxha. Reagimi i Tabakut lidhet me vendimin që qeveria pritet të marrë për ndërprerjen e dhënies së dëmshpërblimeve për trashëgimtarët e ish- të përndjekurve politikë. “Plani i Edi Ramës për të mos dëmshpërblyer familjet e ish- të përndjekurve politikë, është persekutimi dhe poshtërimi i dytë për ish- të përndjekurit. Me vendimin që paralajmëroi ministri i Financave, bëhet e qartë se qeveria e Edi Ramës u tall dhe mashtroi ish- të përndjekurit, të cilëve u premtoi dëmshpërblim të plotë. Por kjo nuk ishte e papritur. Në këto 4 vjet, qeveria e Edi Ramës: uli me e 3.2 mld lekë fondin për kompensimin. Ndryshoi skemën e kompensimit duke shpikur pengesa për të vonuar dëmshpërblimin. Hoqi bursat që u jepeshin familjeve të pasardhësve. Të mos dëmshpërblesh trashëgimtarët e ish- të përndjekurve politikë, të cilët kanë vuajtur, janë dënuar, kanë humbur të drejtat e studimit, janë dëbuar, poshtëruar dhe torturuar njësoj si prindërit dhe të afërmit e tyre të burgosur politikë, do të thotë se nuk ndryshon nga Enver Hoxha”, deklaroi Tabaku. Deputetja e PD- së ka sjellë në vëmendje faktin se qeveria nuk është në vështirësi ekonomike, që ndërmerr këtë vendim, pasi ka paguar faturat e majme të disa koncesioneve, që nuk sjellin asnjë përfitim për qytetarët. Tabaku i ka bërë thirrje çdo të përndjekuri politik për t’iu bashkuar opozitës, në protestën e 27 janarit.