Skema e mashtrimit me TVSH, në gjyq drejtuesit e "Kurum"
Dosja solli konfliktin mes Ginës dhe prokurores Xhaferi
Prokuroria e Elbasanit ka dërguar për gjykim dosjen "Kurum", ku dy drejtues të lartë të kësaj kompanie kanë qenë nën hetim për një skemë mashtrimi me rimbursimin e TVSH- së.
Hetimet bëjnë fjalë për skema të ndodhura në vitet 20112012, me tregtimin e skrapit. Konkretisht, nën akuzë janë vendosur Koray Zeytinoglu, 40 vjeç, me shtetësi turke dhe shqiptare, i cili ka qenë administrator i kompanisë "Kurum" në kohën kur është kryer aktiviteti dhe Yucel Aksu, 35 vjeç, me shtetësi turke dhe shqiptare, i cili ka pasur detyrën e drejtorit të blerjeve në "Kurum". Të dy këta persona akuzohen për kryerjen e veprave penale të mashtrimit dhe pastrimit të produkteve të veprës penale në bashkëpunim dhe më shumë se një herë. Gjithashtu, nën akuzë është vënë edhe vetë kompania "Kurum" për të njëjtat akuza.
SKEMA E MASHTRIMIT
Përgjatë viteve 2011- 2012, sipas dosjes hetimore, Koray Zeytinoglu dhe Yucel Aksu kanë organizuar dhe zbatuar një skemë mashtruese në lidhje me blerjen e sasive të skrapit. Në bashkëpunim, ata kanë plotësuar fatura tatimore fiktive, sikur kanë blerë skrap nga katër shoqëri me qendër në Tiranë. Mirëpo, këto katër shoqëri nuk kanë pasur asnjëherë aktivitet për skrap. Faturat e falsifikuara për blerje skrapi nga këto kompani, që nuk merreshin fare me skrap, janë depozituar në Drejtorinë e Tatimpaguesve të Mëdhenj në Tiranë, dhe mbi bazën e këtyre dokumenteve të falsifikuara, "Kurum" ka përfituar në mënyrë të jashtëligjshme nga skema e rimbursimit me TVSH- në. "Gjatë hetimeve ka rezultuar se ky aktivitet kriminal i përfaqësuesve të shoqërisë "KURUM INTERNATIONAL" SH. A. është kryer edhe me shoqëri të tjera me qendër në Tiranë dhe në Durrës", shkruan njoftimi i Prokurorisë.
KONFLIKTI ME DRITAN GINËN
Dosja hetimore për skemën e mashtrimit të "Kurum" ishte në dorën e prokurores së Elbasanit, Armanda Xhaferi. Por kjo dosje, në muajin dhjetor u mor nga ish- Kryeprokurori i Elbasanit Dritan Gina. Kjo solli edhe një përplasje mes Xhaferit dhe ish- kreut të Prokurorisë së Elbasanit, Dritan Gina. Prokurorja e akuzoi Ginën se i vodhi dosjen nga zyra, ndërsa ky i fundit reagoi, duke thënë se dosjen e mori për mbylljen sa më të shpejtë të hetimeve dhe se ajo më pas u shpërnda në disa drejtori të ndryshme. Për këtë ndodhi, prokurorja bëri edhe kallëzim për shpërdorim detyre ndaj ish- eprorit të saj, Dritan Gina. Vetëm një muaj më pas, Dritan Gina u shkarkua nga detyra që mbante me urdhër të Kryeprokurores Arta Marku. Ai menjëherë bëri kallëzim te Krimet e Rënda ndaj Kryeprokurores së përkohshme, Arta Marku, duke e akuzuar për shpërdorim detyre.