Pika kufiri të përbashkëta Shqipëri- Greqi
Së shpejti, Shqipëria e Greqia do të kenë pika të përbashkëta kufitare. Kjo praktikë pune do të nisë fillimisht në Kakavijë, më pas edhe në pikat e tjera të kalimit kufitar. Kjo ishte një nga çështjet që u diskutua dje në parim mes drejtoreshës së Kufirit dhe Migracionin, Aida Hajnaj, dhe homologes së saj greke, drejtoreshës Zaharoula Tsirigoti. Gjatë një takimi që ato zhvilluan në Kapshticë, është diskutuar për çështje që kanë të bëjnë me bashkëpunimin e ngushtë midis dy drejtorive të Kufirit, patrullimet e sinkronizuara të shërbimeve policore me qëllim parandalimin, zbulimin dhe goditjen e veprimtarisë kriminale ndërkufitare. Në fjalën e saj, Aida Hajnaj ka shprehur mirënjohjen e saj dhe ka falënderuar homologen për bashkëpunimin e mirë, ndihmën dhe mbështetjen që i kanë dhënë Policisë Kufitare Shqiptare. Gjithashtu, ajo theksoi se forcimi i bashkëpunimit midis drejtorive lokale të Kufirit ka për qëllim shkëmbimin e informacionit dhe objektivin e vetëm, që është parandalimi dhe goditja e krimit ndërkufitar. Homologia e saj greke ka nënvizuar masat e marra në luftën kundër krimit të organizuar në rajonet kufitare. Ajo nënvizoi se patrullimi i përbashkët dhe shkëmbimi i informacioneve, që bëhet ndërmjet dy shërbimeve policore, ka sjellë rezultate pozitive në arrestimin e personave, njëkohësisht dhe në sekuestrimin e lëndëve narkotike. "U diskutuan çështje, që kanë të bëjnë me bashkëpunimin e ngushtë midis drejtorive lokale të Kufirit të të dy palëve, patrullimet e sinkronizuara që janë vendosur dhe që po zbatohen nga të dyja palët, në Kufirin e Gjelbër si dhe në pikat e kontaktit. Po kështu, u diskutua në parim ngritja e pikave të përbashkëta të kalimit kufitar, e cila do të fillojë me Kakavijën dhe pastaj do të zbatohet në të gjitha pikat e tjera që janë në kufirin me Greqinë. Vendosja e patrullimeve të sinkronizuara në kufirin e gjelbër, që nga muaji nëntor dhe në vazhdim, ka ndikuar në parandalimin, zbulimin dhe goditjen e veprimtarisë kriminale ndërkufitare", tha Hajnaj. Ndërsa drejtoresha greke, Zaharoula Tsirigoti, u shpreh se takimi vjen në kuadër të vlerësimeve të bashkëpunimit të deritanishëm, që u inauguruan nga gushti i vitit 2017. "Objektivi ynë i ardhshëm është plotësimi i kuadrit ligjor për qendrën e përbashkët të kontaktit policor dhe bashkëpunimit doganor në Kakavijë dhe vazhdimin e masave që tani jemi duke zbatuar, patrullime të përbashkëta dhe takimet e përbashkëta që po zhvillohen në luftë kundër kriminalitetit", u shpreh Tsirigoti.