Rama firmos: Erzen Shkololli, drejtor i Galerisë së Arteve

Artisti dhe kuratori Erzen Shkololli, ishdrejtori i Galerisë Kombëtare të Prishtinës, do të drejtojë Galerinë Kombëtare të Arteve të Shqipërisë. Pasi priti gati dy muaj mbi tavolinën e Kryeministrit, më në fund emri i tij u firmos dje nga kreu i qeverisë. Në mbledhjen e radhës, “Në mbështetje të nenit 100 të Kushtetutës dhe të pikave 1 e 3, të nenit 9, të ligjit nr. 10352, datë 18.11.2010, ‘ Për artin dhe kulturën’, të ndryshuar, me propozimin e ministrit të Kulturës, Këshilli i Ministrave vendosi: Z. Erzen Shkololli emërohet drejtor i Galerisë Kombëtare të Arteve”. Vendimi hyn në fuqi menjëherë. Shkololli, i cili ka ekspozuar në muzeume të rëndësishme si Stedelijk Museum në Amsterdam, Centre Pompidou, Paris, Tate Modern në Londër, MUMOK, Vjenë dhe ka kuruar ekspozita jo vetëm në Prishtinë dhe Tiranë, do të zëvendë- sojë, tashmë ish- drejtorin Artan Shabani, i cili mbajti këtë post që prej tetorit të vitit 2013. Konkursi për postin e drejtorit të GKA- së u hap që në muajin tetor. Për këtë post, krahas Erzen Shkolollit, kandiduan edhe Helidon Haliti, Kreshnik Xhiku dhe Artur Çela. Por me sa duket, Ministria e Kulturës, e pa të udhës të propozonte pranë qeverisë emrin e Shkolollit. Ky i fundit do të drejtojë një institucion, i cili deri më tani ka pasur pak vëmendje financiare dhe ka nevojë për ndërhyrje si në infrastrukturë, ashtu edhe në përmbajtjen e tij. Linja muzeore e ngritur shumë vite më parë, në periudhën e ish- drejtorit Rubens Shima, pasi ka pësuar shpesh andrrime, heqje dhe vënie punësh, gjatë katër viteve të fundit, pa dyshim që ka nevojë të rikonceptohet. Për më tepër do të jetë vet Shkololli që do të paraqesë platformën e tij drejtuese për institucionin.