Lezha nderon Gjergj Kastriotin, homazhe nga të gjitha komunitetet fetare
Lezha ka përkujtuar 550- vjetorin e ndarjes nga jeta të Heroit tonë Kombëtar, Gjergj Kastrioti Skënderbeu. Në ceremoninë përkujtimore të zhvilluar për këtë rast, të mbajtur te vendvarrimi i Skënderbeut, morën pjesë, krahas autoriteteve vendore dhe qytetarëve, edhe 150 arbëresh të Italisë, të cilët kanë udhëtuar drejt Lezhës për të nderuar mbi varrin e heroit. Pavarësisht rëndësisë së këtyre homazhe dhe faktit se 2018 është cilësuar si Viti i Skënderbeut, ra në sy mungesa e deputetëve dhe përfaqësuesve të qeverisë në këtë përvjetor jubilar. Drejtuesit lokalë dhe përfaqësues të arbëreshëve kanë vendosur kurora me lule mbi varrin e Gjergj Kastriotit ku kanë kryer edhe homazhet. Fjala e rastit është mbajtur fillimisht nga kryetari i Bashkisë Lezhë, Fran Frrokaj, i cili solli në vëmendje përpjekjet e pandërprera të Gjergj Kastriotit për mbrojtjen e atdheut. Ai tha se Heroi ynë Kombëtar e bëri edhe Lezhën të pavdekshme duke zgjedhur të prehet përjetësisht në katedralen e Shën Kollit dhe vdekja e tij ishte ditë zie jo vetëm për Arbërinë, por edhe për mbretëritë e Europës.
“Këtu, në këtë qytet, në këtë kishë, në këtë altar, prehen eshtrat e Gjergj Kastriotit duke mbyllur edhe një nga faqet më të lavdishme të mesjetës. Lezha e përcolli me kambanat e kishave, që lajmëruan zbritjen në varr të Kryetrimit të arbërve duke shënuar kështu edhe fundin e lavdisë së principatave shqiptare për atë periudhë. Atë ditë u shua krenaria, që për 25 vjet i dha shkëlqim Mesjetës, nga malet e Ballkanit e deri në Vatikan dhe Europë, me luftën e drejtë dhe në mbrojtje të lirisë, trashëgimisë historike, vlerave njerëzore të popullit dhe principatave arbënore. Skënderbeu i është imponuar historisë së Shqipërisë si Hero Kombëtar, Europës si simbol i qëndresës e Mesjetës, si një ndër gjeneralët më të shquar. Lezha gjithmonë do të identifikohet me Gjergj Kastriotin pasi që nga dita e lidhjes së shqiptarëve, Besëlidhjes së 2 marsit 1444, e deri kur hyri për herë të fundit në këtë qytet, ai e ktheu Lezhën në kryeqendrën diplomatike të kohës.”
Përfaqësuesit e besimeve fetare e vunë theksin te bashkimi i popullit pa dallim feje, në dashurinë për atdheun dhe njeri- tjetrin. Kështu, për arqipeshkvin Angelo Masafra, epopeja e Skënderbeut është epopeja jonë.
“Është epopeja jonë, epopeja e Skënderbeut, kështu që ai na mëson: Shqiptarë, kudo që jeni, bashkohuni në emër të zotit e në emër të kombit, për vlerat, traditat dhe ta dashurojmë atdheun.”
Duke iu referuar ditës homazh për Gjergj Kastriotin, myftiu i Lezhës, Agim Terziu, tha se për besimtarët myslimanë shqiptarë, Skënderbeu është heroi i kombit dhe se askush nuk duhet hedhë përçarje te shqiptarët, pasi po vepron në kundërshtim me atë që na mësoi vetë Gjergj Kastriot Skënderbeu. “Jam këtu për të konfirmuar në emër të të gjithë besimtarëve myslimanë dhe besimit që ne kemi se për ne, figura e Skënderbeut është e nderuar. Ai është simbol i bashkimit të shqiptarëve. Nëse ne nisemi për të ditur se sa vite Skënderbeu ka qenë katolik, ortodoks apo mysliman, atëherë shkojmë drejt përçarjes. Ka pasur burra të fortë ky shtet, kur u themelua në 1912, e këta njerëz të mëdhenj duhen ndjekur për shembullin e tolerancës fetare që na kanë lënë trashëgimi dhe ky shpirt i madh i popullit shqiptar, shpirti i tolerancës, shpresojmë që të vazhdojë në shekuj.”