Cikalleshi përmbys Beshiktashin me dopietë e Panenka

Klasi i sulmuesit të Kombëtares nuk mjafton, Osmanlispor eliminohet nga Kupa

Sokol Cikalleshi ka qenë me të vërtetë "në flakë" mbrëmjen e djeshme, teksa ka shënuar dy gola në përballjen e Kupës së Turqisë që Osmanlispori luajti ndaj Beshiktashit.

Ishin miqtë ata që zhbllokuan sfidën, vetëm në minutën e 83- të, por ka qenë bomberi i Kombëtares Shqiptare, ai që ka kthyer për dy minuta rezultatin. Në fillim, në minutën e 86- të, kavajasi shënoi golin e parë, ndërsa vetëm dy minuta më vonë shënoi edhe golin e kthesës me 11- metërsh.

"BOMBAT"

Sfida e parë kishte përfunduar në avantazh të skuadrës së Beshiktashit, mirëpo, për shqiptarin asgjë nuk pati rëndësi. Sokol Cikalleshi nuk u dorëzua, jo vetëm pas rezultatit 4- 1 në sfidën e parë, por as për faktin që Osmanlispor u ndëshkua në shtëpi në ndeshjen e kthimit. Një aksion nga e djathta u shfrytë- zua maksimalisht nga sulmuesi. I gjendur në zonë, duke fituar hapësirën e nevojshme përballë mbrojtësve, shqiptari rrotullohet për t'iu drejtuar portës dhe lëshon një silurë, e cila edhe pse kuptohet nga portieri i Beshiktashit, nuk ndalet dot dhe përfundon në rrjetë. Mirëpo, nuk mbaroi me kaq. "Show" i sulmuesit kuqezi ka vijuar dhe brenda 120 sekondash ka përmbysur rezultatin. Këtë herë edhe më klas. Përballë portierit të Beshiktashit, shqiptari gjendet vetëm 11 metra larg. Forcë? Potencë? Asnjëra nga këto. Sulmuesi i përfaqësueses kuqezi zgjedh të shfaqë cilësi dhe klas. Me një goditje alla "Panenka", Cikalleshi ekzekuton saktësisht duke e kaluar mbi portierin, i cili e sheh sferën të përfundojë në rrjetë. Dy gola në po kaq minuta dhe Osmanlispor përmbys takimin. Por, gjithsesi, kjo fitore falë Cikalleshit nuk u shërbeu turqve të Osmanslisporit, që e kishin humbur ndeshjen e parë me shifrat 1- 4 dhe përfundimisht u eliminuan në raundin çerekfinal të Kupës së Turqisë.