Protesta, Kryemadhi: Do t’i përgjigjemi vullnetit të qytetarëve
Kryetarja e LSI- së, Monika Kryemadhi, tha dje se opozita do t’i përgjigjet vullnetit të qytetarëve gjatë protestës së 27 janarit. “Ne do t’i përgjigjemi vullnetit të protestuesve, ata do të jenë ata që do të vendosin. Nëse maxhoranca e mandateve të 25 qershorit nuk e ka kuptuar që ka hyrë në rrugë pa krye, opozita ka humbur rolin thelbësor në Parlament, do t’u drejtohet qytetarëve”, tha Kryemadhi. Sipas saj, protesta është demokratike, ndërsa qëllimi i saj nuk është të protestohet vetëm ndaj zgjedhjes së Kryeprokurorit të përkohshëm të Përgjithshëm. Protesta e 27 janarit është një protestë demokratike. Opozita është e detyruar nga kërkesa të qytetarëve. Në takimet tona shohim një reagim të trishtë, ndiejmë dhimbjen e bizneseve të vogla, të të papunëve. Protesta e 27 janarit i përmbledh të gjitha”, tha Kryemadhi. Kryetarja e LSI- së akuzoi Kryeministrin Rama se dezinformon ndërkombëtarët. “Rama nuk mund të vazhdojë më të fshihet pas kostumeve dhe fustaneve të ndërkombëtarëve, sado që ai mundet t’i manipulojë, t’i keqinformojë. E them me bindje, se në të gjitha takimet dhe kontaktet që kemi pasur me ambasadorë dhe institucione të tjera, shikojmë që ka një deformim që kur ka filluar fushata zgjedhore dhe procesi zgjedhor dhe deri më datën 18 dhjetor. Nuk di të ketë ndonjë ndërkombëtar, që t’i ketë thënë Ramës zgjidhe prokurorin me 69 vota. Euralius është një institucion konsultativ, jo vendimmarrës. Për LSI dhe gjithë klasën politike, Komisioni i Venecias është kryesori, do të njoftojmë dhe Komisionin e Venecias për nenin 88 në Kushtetutë”, tha kryetarja e LSI- së.