PD, letër ONM e ambasadorëve për KLGJ e KLP
“Sekretari i Përgjithshëm ka injoruar ONM, tejkaloi kompetencat”
Partia Demokratike, përmes një shkrese iu drejtua Presidentit të Republikës, diplomatëve të huaj në Tiranë dhe kryetarëve të grupeve parlamentare për parregullsitë në procesin e përzgjedhjes së 5 anëtarëve jo magjistratë për KLGJ dhe KLP. Letra e firmosur nga kreu i Grupit të PD, Edmond Spaho, shpreh shqetësimin për tejkalimin e kompetencave nga Sekretari i Përgjithshëm i Kuvendit, Genc Gjonçaj, në përcaktimin e kandidatëve jo gjyqtarë dhe jo prokurorë në KLP dhe KLGJ. "Sekretari i Përgjithshëm i Kuvendit ka injoruar, në tejkalim flagrant të kompetencave të tij kushtetuese dhe ligjore, vlerësimet e bëra nga Operacioni Ndërkombëtar i Monitorimit ( ONM), duke kualifikuar të paktën 3 kandidatë të skualifikuar nga ky organ kushtetues ndërkombëtare. Kualifikimi i kandidatëve të skualifikuar nga ONM nuk është kompetencë e Sekretarit të Përgjithshëm të Kuvendit, por e 4 anëtarëve të Nënkomisionit ad hoc të Përzgjedhjes ( që ka 5 anëtarë gjithsej). Për pasojë, lista që i është paraqitur për votim Komisionit të Ligjeve, përmban kandidatë që janë skualifikuar nga ONM. Ky veprim bie ndesh me pikat 5 dhe 6 të nenit 179 të Kushtetutës si dhe nenet 286 dhe 287 të ligjit nr. 115/ 2016 "Për organet e qeverisjes së sistemit të drejtësisë"", thuhet në letrën e PD. Sipas demokratëve, procesi i kandidimit dhe veprimet e institucioneve të përfshira në procedurën e përzgjedhjes nuk është koordinuar dhe mbikëqyrur nga një Komision i Pavarur, që duhet të kishte ngritur Kuvendi dhe veprimet e këtyre organeve, në kundërshtim me ligjin, janë koordinuar nga Sekretari i Përgjithshëm i Kuvendit. Sipas përfaqësuesve të opozitës, këto veprime apo mosveprime, që përbëjnë shkelje të rënda të Kushtetutës dhe ligjit, kanë impakt të drejtpërdrejtë në pavarësinë e institucioneve të reja. Spaho i ka bërë thirrje maxhorancës të kthejë kushte tutsh mërinë në procesin e zgjedhjes së anëtarëve të KLP- së dhe KLGJ- së. "Kërkojmë marrjen e masave të menjëhershme, për të rikthyer kushte tutsh mërinë dhe ligjshmërinë në zbatimin e Reformës në Drejtësi në tërësi dhe në këtë proces përzgjedhës në veçanti. Këtij qëllimi i shërbejnë edhe amendamentet e paraqitura nga opozita, më 15 janar 2018, për zgjidhjen kushtetuese dhe ligjore, të situatës së paligjshmërisë së krijuar me Prokurorin e Përgjithshëm", thuhet në letrën e firmosur nga kreu i Grupit të PD.