Xhafaj: Asnjë shkelje, bashkë me LSI ramë dakord për ligjin

Ministri i Brendshëm, Fatmir Xhafaj, drejtues i Reformës në Drejtësi, e cilësoi zgjedhjen e Prokurores së Përgjithshme të përkohshme, brenda përcaktimeve kushtetuese. I ftuar në emisionin “Kapital” në “Vizion Plus” të gazetarit Aleksandër Furxhi, Xhafaj tha se LSI ka dhënë dakordësinë për këtë ligj. “Nuk ka shkelje as në Kushtetutë dhe as në ligj për zgjedhjen e Prokurores së Përgjithshme të përkohshme. Ligji në fjalë është tërësisht kushtetues. Me LSI- në e kemi diskutuar në komision dhe e ka votuar atë në seancë. PD dihet që nuk ka qenë ndonjëherë mbështetëse e Reformës në Drejtësi, e ka ankimuar një sërë ligjesh në Gjykatën Kushtetuese”, tha Xhafaj. Sipas tij, amendamenti ka qenë një zgjidhje e përkohshme. “Për sa kohë që ai ligj është në fuqi, ai është në përputhje të plotë me Kushtetutën.

Edhe amendamenti në fjalë nuk është zgjedhje, ligji është, por ai është një përcaktim i përkohshëm për të plotësuar vakancën e krijuar nga përfundimi i mandatit të Prokurorit të Përgjithshëm”, u shpreh ministri i Brendshëm. Sipas tij, Reforma në Drejtësi do të nisë të japë rezultatet e para brenda muajit shkurt. “Reforma në Drejtësi është produkti më i mirë që kemi bërë si maxhorancë dhe jam i bindur se, shumë shpejt, njerëzit do të shohin rezultatet e para pozitive të vetingut, besoj brenda muajit shkurt. Këto rezultate nuk do të ndryshojnë vetëm sistemin e drejtësisë dhe raportin e njerëzve të drejtësisë me ligjin, por dhe raportin e sistemit me qytetarët”, tha Xhafaj.