Legalizimet, si do lidhen kontratat me Ujësjellësin
Pakti i UKT me ALUIZNI- n, vërtetimet do merren online
Për lidhjen e kontratës me Ujësjellësin e Tiranës, nuk do të kërkohet më vërtetim nga ALUIZNI. Falë një marrëveshjeje të firmosur mes dy institucioneve, qytetarët çlirohen nga ky detyrim. Përmes një njoftimi për mediat, Agjencia e Legalizimeve ka njoftuar dje, se të gjithë ata që nuk e kanë përmbyllur praktikën e legalizimit apo janë në proces, nuk do ta kenë më të nevojshme të paraqiten në sportele për të marrë vërtetim pasi do të jetë UKT që, nëpërmjet portalit qeveritar “eAlbania”, do të sigurojë këtë dokument. “Që prej datës 23 janar, të gjithë qytetarët që kanë objekte në proces legalizimi, nuk do të kenë më nevojë që të paraqiten pranë zyrave të ALUIZNI- t për t’u pajisur me vërtetime, për të bërë lidhjen me UKT- në. Ky shërbim do të kryhet direkt nga vetë Drejtoria e Ujësjellës- Kanalizime Tiranë, sipas marrëveshjes së bërë midis dy institucioneve, ALUIZNI- t dhe UKT. Kjo marrëveshje ka si qëllim formalizimin e bashkëpunimin për shkëmbimin e informacionit në funksion të efektivitetit, reduktimit të kostove administrative dhe ofrimin e shërbimit ndaj qytetarëve. Drejtorisë së Ujësjellës- Kanalizimeve Tiranë i është siguruar e drejta e hyrjes në bazën e të dhënave të aplikimeve për legalizim të ndërtimit pa leje nëpërmjet portalit “e- Albania”, thuhet në njoftim. Nisma është shtrirë fillimisht në Tiranë, për të vijuar më pas në të gjithë vendin. “Në ditët në vijim, sipas një kalendari, një marrëveshje e tillë që lehtëson punën dhe shkurton sorollatjet e qytetarëve, do të shtrihet edhe në drejtoritë e tjera të vendi”. Vetëm pak ditë më parë, Bashkia e Tiranës paralajmëroi aksionin për reduktimin e humbjeve në rrjet si edhe dhënien fund të abuzimeve. Për të çuar para këtë operacion, një ndër hapat e ndërmarrë ishte ai për lidhjen e kontratave me ato familje, të cilat janë në proces legalizimi. Synimi i kësaj fushate, e cila do të shtrihet në të gjithë vendin, është që, për një kohë të shkurtër, 90% e konsumatorëve të pajisen me matës uji, të cilët bëjnë një faturim të drejtë.