Të dashurit të Viola Spiros i sekuestrohen 1.4 milionë euro pasuri
"Forca e Ligjit" bllokon një hotel, biznese, vila, makina luksoze e truall të Valentin Selajt e 2 vëllezërve të tij
"Forca e Ligjit" goditi dje në Lezhë, duke sekuestruar 1.4 milionë euro pasuri në emër të tre vëllezërve Selaj, që dyshohen të jenë ngritur me të ardhura nga krimi.
Pronat e sekuestruara janë në pronësi të Valentin Selajt, i dashuri i moderatores sportive, Viola Spiro, dhe të dy vëllezërve të tij, Parlind dhe Arlind Selaj. Bëhet fjalë për 7 ambiente biznesi, hotel, bar e restorant, 4 ambiente banimi, apartamente e vila, 4 parcela toke me sipërfaqe rreth 12 mijë metër katror si dhe 9 automjete luksoze. Të gjitha këto prona, që u vunë nën sekuestro preventive, pas një procedimi penal të nisur në vitin 2017 nga Policia e Prokuroria e Lezhës, kapin vlerën e 1 450 000 eurove. Për sekuestrimin e tyre, Policia ka ekzekutuar vendimin e Gjykatës së Lezhës, për akuzën "pastrim i produkteve të veprës penale". Tre vëllezërit Selaj, Policia i konsideron grup kriminal, ndërsa thekson se përveç Valentin Selajt, që u arrestua në nëntor të vitit të kaluar, edhe Ardian Selaj ka qenë i dënuar më parë në Itali, për trafikim narkotikësh dhe ka qenë i dënuar me 4.6 vite burgim.
ARRESTIMI NE ITALI
Në nëntor të vitit të kaluar, Policia italiane dhe ajo holandeze finalizuan një megaoperacion antidrogë duke vënë në pranga 7 persona, që trafikonin kokainë nga Amerika e Jugut në Roterdam e më pas në Firence. Një prej të arrestuarve, i konsideruar nga mediat italiane si "zoti i kokainës", ishte shtetasi shqiptar Valentin Selaj, i dashuri i moderatores Viola Spiro. Gazeta italiane "La Nazione" i kushtoi një artikull të veçantë çiftit, duke publikuar në faqen e parë foton e të dyve, ku shkruan se i dashuri i prezantueses shqiptare kishte një rol kryesor në trafikun e drogës. Sipas mediave italiane, Valentin Selaj ishte personi që sillte kokainën nga Amerika e Jugut në Firence, duke kaluar më parë përmes Holandës. Grupi shqiptar i trafikut të kokainës, që drejtohej nga i dashuri i Viola Spiros, u zbulua nga një hetim i gjatë që u krye nga 4 femra. Dy prokurore të Amsterdamit, një oficere e sektorit investigativ në Holandë dhe një tjetër në Itali. Pas hetimeve intensive, që u iniciuan nga dy prokuroret holandeze, Policia italiane dhe ajo e Holandës finalizuan një megaoperacion antidrogë më 16 nëntor, duke vënë në pranga 7 persona, që trafikonin kokainë nga Amerika e Jugut. Gazetarët italianë ironizonin rreth pasurisë që kishin ngritur me qindarka grupi i trafikut të drogës. "Një kuriozitet; një tjetër bos droge i grupit, jetonte në një vilë luksoze e stilit ' Scarface'. Madje, ai mbante foto të këtij personazhi si një idhull të tij. Dhe në fakt, edhe fundin e pati pikërisht si ai. Ndërsa një tjetër bos i grupit kishte blerë një hotel luksoz në Shqipëri me qindarka", ironizonin gazetarët italianë.