Greqi, Guvernatori i Bankës, dy Kryeministra, në listën e zezë
Skandali, për ryshfet edhe Komisioneri i BE, Avramopoulos
Parlamenti i Greqisë ka emërtuar dy ishkryeministra dhe tetë ish- ministra, përfshirë Guvernatorin aktual të Bankës Greke, Yannis Stournaras, dhe komisionerin e Punëve të Brendshme të BE, Dimitris Avramopulos, si të lidhur me një skandal të rëndë ryshfeti mjekësor.
Sipas “Associated Press”, Parlamenti njoftoi të martën rezultatet e një hetimi gjyqësor për ryshfetet e dyshuara, që u paguhen zyrtarëve publikë nga prodhuesi zviceran farmaceutik “Novartis”, prej gati një dekade, për të rritur abonimet e produkteve të tyre në spitalet publike si dhe çmimet e shitjes. “Ky është një skandal masiv, që ka habitur shoqërinë greke”, ka deklaruar zëdhënësi i qeverisë aktuale, Dimitris Tzanakopoulos. Sipas ligjit grek, politikanët nuk përballen me ndjekje penale nga autoritetet gjyqësore. Pretendimet duhen së pari t’i referohen Parlamentit për shqyrtim, para se deputetët të votojnë për të hequr imunitetin automatik ndaj të akuzuarve. Sipas AP, politikanët që janë emërtuar si të përfshirë në këtë skandal janë ish- Kryeministri konservator, Antonis Samaras, ish- Kryeministri i përkohshëm, Panagiotos Pikramenos në 2012, si dhe pesë ish- ministra të Shëndetësisë, përfshirë Avramopu- los. Stournaras ishte ministër i Financave përpara se të shkonte në postin e Guvernatorit të Bankës Qendrore. Të gjithë të përmendurit i kanë mohuar akuzat. Samaras, ishKryeministri konservator, i cili shërbeu në periudhën 2012- 2015, tha se akuzat kundër tij ishin të motivuara politikisht dhe u zotua të ngrinte një padi kundër Kryeministrit të krahut të majtë, Alexis Tsipras. “Ky është konspiracioni më i pamëshirshëm, por edhe më qesharak ndonjëherë”, tha ai. Kompania “Novartis” tha se po bashkëpunon me autoritetet greke. Një deputete e Parlamentit, Tasia Christodoulopoulou, lexoi emrat e të dyshuarve si të korruptuar, në një seancë të së martës. Ajo tha se veprat e pretenduara përfshinin ryshfet dhe shkelje të detyrës, por nuk dha detaje të mëtejshme.