Akademia e Shkencave, përplasje në grupin e punës
Debati për të fituar me shumicë kartonësh dhe jo argumentesh
Pas dorëheqjes së kryetarit të zgjedhur të Akademisë së Shkencave, Gudar Beqiraj, një grup pune po punon për t’i paraqitur Kryeministrit Rama propozimet për reformimin e saj.
Janë 9 akademikë që përbëjnë grupin e punës për reformimin e Akademisë së Shkencave, të kryesuar nga Apollon Baçe e në përbërje të të cilit janë; Skënder Gjinushi, Anastas Angjeli, Kosta Bajraba, Aurela Anastasi, Salvator Bushati, Neki Frashëri, Floran Vila dhe Artan Fuga. Nga Kryeministri, atyre u është kërkuar as më shumë e as më pak, por miradministrimi i kësaj të mire publike, pra, reformim nëpërmjet rithemelimit. Grupit të punës, edhe pak javë i kanë mbetur për të paraqitur platformën e tyre të reformimit. Por mësohet se pjesëtarët e këtij grupi nuk kanë një dakordësi mes tyre. Pra, siç duket, akademikët janë ende larg të gjendurit të një mendimi të përbashkët. Në fakt, gazeta “Panorama” ka marrë infor- macionin se midis pjesës tjetër të komisionit dhe kritikut nga brenda të Akademisë Shkencave, prof. Artan Fugës, i cili i pari ngriti shqetësime për domosdoshmërinë e reformës në Akademinë e Shkencave, ka pasur përsëri mospërputhje thelbësore. Anëtarë të ishkryesisë së vjetër theksojnë se kriteri i shumicës vlen për të treguar se cili opinion është i vlefshëm dhe cili jo, kurse kritiku i saj i qëndron idesë se në shkencë as bëhet fjalë për ta barazuar të vërtetën me vullnetin e shumicës. Ai lë të nënkuptohet se reforma po bëhet brenda një kuadri, që u përshtatet interesave personale të disa aktorëve brenda Akademisë të Shkencave.
Gazeta “Panorama”, pasi u informua për këtë mosdakordësi, siguroi edhe pikat ku prof. Fuga mbështet kritikat dhe mospranimet për një nga dokumentet e reformës, që Komisioni ad hoc aprovoi.