Miratohet drafti, pritet nisja e vetingut në Polici
Zv. ministri i Brendshëm: Ministria, jashtë procesit të vlerësimit
Vetingu në Policinë e Shtetit dhe Gardën e Republikës nuk është thjesht “fshesa” e radhës, por më tepër promovim i efektivëve të ndershëm, të aftë dhe të përkushtuar.
Kështu e ka konsideruar dje zv. ministri i Brendshëm, Julian Hodaj, procesin e vlerësimit të Policisë, Gardës e SHÇBA, që pritet të nisë së shpejti, pasi qeveria miratoi projektligjin e vetingut. Gjatë një deklarate, pas mbledhjes së qeverisë që miratoi draftin, Hodaj u shpreh se Ministria e Brendshme nuk do të jetë pjesë e procesit e vlerësimit. Ky vendim është marrë në mënyrë që të garantohet pavarësia, paanshmërinë dhe besueshmërinë e vetingut, përkundrejt punonjësve që vlerësohen apo përkundrejt publikut. “Vlerësimi kalimtar i punonjësve të Policisë së Shtetit, Gardës së Republikës dhe SHÇBA- së, nuk është thjesht ‘ fshesa’ e radhës. Pa dyshim, pastrimi i radhëve është i rëndësishëm kur në kushtet brenda tyre ka elementë të prekur nga krimi dhe korrupsioni apo të paaftë. Gjithsesi, aspekti më i rëndësishëm i kësaj nisme është një tjetër, është promovimi i atyre që janë të ndershëm, të aftë dhe të përkushtuar, është çlirimi i energjive pozitive, sot disi të fjetura, te pjesa e shëndoshë e institucioneve”, u shpreh dje Hodaj. Sipas tij, janë konsideruar me kujdes të gjitha aspektet organizative dhe financiare për një proces të paanshëm, cilësor e transparent, të shpejtë në kohë dhe me kosto të përballueshme pasi procesit do t’u nënshtrohen rreth 13 mijë punonjës.
VETINGU Të 13 mijë punonjësit e Policisë së Shtetit, si dhe punonjësit e Gardës e të SHÇBA do t’i nënshtrohen procesit të vlerësimit kalimtar, menjëherë pasi Ligji për Vetingun të hyjë në fuqi. Përveç tyre, vetingut mund t’i nënshtrohen me dëshirë edhe ish- punonjësit e Policisë nën moshën 55 vjeç, përfshirë edhe të shkarkuarit nga detyra, por që Gjykata u ka dhënë të drejtë duke shfuqizuar urdhrin e shkarkimit. Komisioni i Jashtëm i Vlerësimit do të verifikojë 287 zyrtarët më të lartë të Policisë, që nga Drejtori i Përgjithshëm deri te shefat e komisariateve. Më pas, 2700 punonjës të Policisë me grada të mesme dhe 115 nga Garda, përfshi edhe repartet speciale RENEA, FNSH dhe Forcat e Posaçme Operacionale do të kontrollohen nga Komisioni Qendror. Ndërkohë, të gjithë efektivët e nivelit bazë do të kontrollohen nga 135 anëtarë të Komisioneve Vendore, shumica e të cilëve do të jenë punonjës Policie, që do ta kalojnë të parët vetingun nga Komisioni Qendror i Vlerësimit. Kontrollet, të cilave do t’u nënshtrohen të gjithë, janë kontrolli i pasurisë, i pastërtisë së figurës dhe vlerësimi profesional. Kontrolli i pasurisë fillon me një vetëdeklarim të efektivit dhe të familjarëve të tij.
KOMISIONET Komisioni i Jashtëm i Vlerësimit, Komisioni Qendror i Vlerësimit dhe Komisionet Vendore dhe të Posaçme të Vlerësimit, janë tri organet, që do të kryejnë verifikimin e punonjësve të Policisë. Organet e vlerësimit organizohen në trupa vlerësimi, të cilat janë përgjegjëse për marrjen e vendimeve ndaj subjekteve të vlerësimit. Trupat e vlerësimit përbëhen nga tre anëtarë, të cilët caktohen me short nga Komisioni përkatës i vlerësimit, ku përcaktohet relatori i trupës së vlerësimit. Organet e vlerësimit kalimtar mbështeten nga sekretariate teknike gjatë gjithë veprimtarisë së tyre, sipas parashikimeve të këtij ligji.