Deklarata e fitores, Duka: Zgjedhje me standard, do bind edhe kritikët
I saposhpallur president i FSHF- së, Armand Duka, u ngjit në podium për të mbajtur fjalimin e fitores: "Jam i lumtur dhe i emocionuar, jo për faktin se do të jem presidenti, por për besueshmërinë dhe ndiej obligimin e madh se nga sot fillon një gjë, akoma më e vështirë për mua. Asambleja u zhvillua brenda standardeve, dëshmon se ne jemi një organizatë me standard të lartë brenda shoqërisë. Ju garantoj të gjithëve se ato që janë diskutuar në këto muaj parazgjedhor do të jenë pjesë e diskutimit, do t'i korrigjojmë dhe do bëjmë më të mirën. Falënderoj shumë kandidatët, të ftuarit. Ju premtoj se përkushtimi im do të jetë akoma më i madh, më ka dhënë shumë mësime kjo Asamble", tha ndër të tjera kreu i FSHF- së. Pas daljes nga salla, Duka iu përgjigj edhe interesimit të mediave:
Fitorja - "Nuk mund ta fsheh që jam i lumtur që shumica e Asamblesë më votoi. Jo për faktin që do të jem president i FSHF- së, por për faktin që kanë vlerësuar kontributin apo drejtimin e Federatës së Futbollit, kanë vlerësuar marrëdhënien me presidentin e futbollit dhe kjo vërtet më bën të lumtur. Më shumë vlerësim, i asaj çfarë kam dhënë, u shpreh nëpërmjet kësaj mbështetjeje. Pasi ka dalë rezultati, sinqerisht jua them, kam filluar të mendoj jo vetëm për ato që duhet të bëj nga çfarë kam thënë vetë, por edhe ato që kanë thënë të tjerët. Zoti Fino, të cilin dua ta falënderoj që kishte vullnetin apo dëshirën për të qenë pjesë e familjes së futbollit, apo zoti Hala, apo nga gjithsecili që është shprehur gjatë kësaj periudhe zgjedhore. Nga të gjithë problematikat që janë diskutuar, patjetër ka shumë gjëra që ne, unë bashkë me Komitetin e ri Ekzekutiv, t'i reflektojmë dhe t'i përmirësojmë për të mirën e futbollit shqiptar në të ardhmen".
Garë e vështirë? - "Do të doja që të ritheksoja edhe faktin që jam i lumtur, edhe për mënyrën se si u organizua kjo Asamble. Kisha besim që familja e futbollit di të bëjë or- ganizime të tilla dhe ne këtë ua demonstruam jo vetëm atyre që ishin në vend, por edhe përfaqësuesve të institucioneve ndërkombëtare UEFA dhe FIFA. Të gjithë atyre që na kanë ndjekur nëpërmjet ekraneve të mediave, që familja jonë është një standard tjetër. Standard tjetër, jo vetëm në fushë me çfarë ka dhuruar me të gjithë problematikat që ka, por me rezultate pozitive. Demonstruam që kemi bërë shumë punë, edhe për standardin dhe demokracinë e organizimit të zgjedhjeve".
Ankimimi i Finos - "Të gjithë pamë një nivel shumë të lartë organizimi të një Asambleje, për nga mënyra si u organizua. Unë nuk i heq të drejtën askujt, që të japë mendimet apo të ndjekë dëshirat e veta".