Komiteti Ekzekutiv, ja anëtarët e rinj të qeverisë së futbollit
Zgjedhje të reja, por qeveria e futbollit është votëbesuar. Në punimet e Asamblesë së futbollit, anëtarësia e Komitetit Ekzekutiv të mandatit të fundit është rizgjedhur plotësisht, me përjashtim të vetëm dy prej anëtarëve që nuk kanë kandiduar. Krahas shtatë anëtarëve, që kanë bashkëqeverisur me Armand Dukën në katër vitet e fundit, do të jenë në KE edhe Enkelejd Alibeaj dhe Edmond Spahiu, si anëtarët që kanë fituar dje mandatin. Në garë pati edhe "të humbur" të mëdhenj, që vinin si nga bota e jurisprudencës me në krye Theodhori Sollakun, por sigurisht edhe nga ajo e sportit me në krye Shkëlqim Muçën, Artan Shytajn dhe Eduard Prodanin.
ZGJEDHJET
Pasi Asambleja votoi presidentin e ri të Federatës, punimeve në rendin e ditës, i erdhi radha zgjedhjes së qeverisë së futbollit. Në votim, delegatët me të drejtë vote do të caktonin 9 anëtarë të Komitetit Ekzekutiv nga 23 alternativa, që kishin në fletë. Edhe një herë, votimi nisi me rikujtimin e rregullave të votimit për të saktësuar shenjat me të cilat do të caktohej alternativa e zgjedhur, si dhe faktit që një delegat mund të votonte jo më shumë se 9 anëtarë ( aq vende vakantë për KE, duke qenë se presidenti i FSHF- së dhe presidenti i Shoqatës së Arbitrave janë automatikisht të përzgjedhur në KE, për të plotësuar numrin prej 11 anëtarësh).
VOTIMET
Edhe për anëtarët e Komitetit ekzekutiv u deshën dy raunde votimi. Në të parin ishin Arben Dervishaj ( 42 vota), Abdyl Kuriu ( 40 vota), Bardhyl Jera ( 37 vota), Lutfi Nuri ( 34 vota), Vasil Bici ( 32 vota), që siguruan mandatin duke marrë vota mbi numrin prej 50+ 1 % të votave. Në këtë raund, pjesa e mbetur prej katër anëtarësh nuk arritën që të siguronin këtë kuotë. Kjo bëri që 18 alternativat e mbetura të rihyrin edhe një herë në proces zgjedhjeje.
ANOMALIA
Që në përfundimin e raundit të parë të votimit për Komitetin Ekzekutiv, u larguan një pjesë e madhe e delegatëve. Kjo bëri që, në raundin e dytë, prania në sallë të ishte më e ulët. Në këtë raund ia dolën që të sigurojnë një mandat, Enkelejd Alibeaj ( 29 vota), Edvin Libohova ( 26 vota), Bardhyl Minxhozi ( 21 vota), Edmond Spahiu ( 18 vota). Përzgjedhja e Libohovës dhe Minxhozit në këtë raund votëbesoi plotësisht qeverinë e futbollit në mandatin e fundit.