Bregasi: Biznesi e mbështet reformën e derregullimit
Kreu i “Biznes Albania”, Luan Bregasi, në emër të sipërmarrjes, tha dje se e mbështet reformën e derregullimit, si një mundësi që lehtëson biznesin dhe shmang korrupsionin. “Dua të them që në fillim se ne sipërmarrësit e kemi mbështetur këtë projekt, madje e tha zonja zv. kryeministre, ne ishim të papërgatitur, na gjeti pak në befasi qeveria dhe është hera e parë që qeveria është përpara sipërmarrjes. Ky nuk është një proces i lehtë, por ne jemi të sigurt që tash e tutje do të marrim shërbime me lehtësi shumë më të madhe, me më pak burokraci, me më pak korrupsion, do të rritet cilësia e bërjes së këtyre shërbimeve dhe sigurisht do të dekurajohet dhe oferta për punë në shtet. Kjo do të na japë edhe ne mundësi që një pjesë e atyre, që kërkojnë punë në shtet dhe kanë dëshirë të punojnë, t’i afrohen sipërmarrjes private”, tha Bregasi. Ai vlerësoi nismat e ndërmarra deri tani si pjesë e kësaj reforme. “Drejtoria e Përgjithshme e Doganave, inauguroi pak ditë më parë një shërbim, “KanaliBlu”, i cili rrit shpejtësinë e zhdoganimit të mallrave për gati 20 minuta. Mallrat nuk vijnë më në doganë, shkojnë vetëm faturat dhe për subjekte, që kanë fituar besimin e institucioneve për korrektësinë e tyre, të zhdoganojnë për 20 minuta. Kjo nuk ka ndodhur asnjëherë në Shqipëri. Kemi pritur me ditë, ndoshta dhe me javë për të bërë këtë procedurë. Duket se jemi në drejtimin e duhur për të lehtësuar marrëdhënien e shtetit me sipërmarrjen”, tha kreu i “Biznes Albania”. Sipas tij, derregullimi do të ndikojë pozitivisht në përmirësimin e cilësisë së shërbimeve për qytetarët. “Në vendet e BEsë, institucioni i bën njerëzit, sepse kultura dhe tradita e këtyre shteteve është shumëvjeçare, ndërsa në Shqipëri, duhet që njerëzit bëjnë institucionin. Përderisa ne kemi këtë kontradiktë, që me gjithë përpjekjet që bëhen, nëpunësit janë larg shërbimeve që duhet të marrin qytetarët dhe sipërmarrja, atëherë derregullimi është mënyra më e mirë që gradualisht njerëzit të ndikojnë në rritjen dhe konsolidimin e institucioneve shqiptare”, tha kreu i “Biznes Albania”.