Eduard Halimi tërhiqet nga politika, dy gra dorëhiqen për Astrit Veliajn deputet
Ish- ministri: Do t'i përkushtohem një projekti privat
Deputeti i Partisë Demokratike, Eduard Halimi, ka vendosur të heqë dorë nga mandati i deputetit dhe ka njoftuar se do të largohet nga politika aktive.
Me një vendim të papritur, nënkryetari i Komisionit të Ligjeve në Kuvend ka njoftuar largimin përmes një statusi në "Facebook". Kryesuesi i listës së PD- së në Berat, në zgjedhjet parlamentare të vitit 2017, sqaroi se tërheqja e tij nga politika ka ardhur si pasojë e një angazhimi të ri të tij në fushën e jurisprudencës. "Për mua ka qenë një privilegj të zgjidhem për të tretën herë deputet i Kuvendit të Shqipërisë. Gjatë këtyre viteve kam kontribuuar më përkushtim të plotë në politikë si njeri i çështjeve të drejtësisë. Sot kam dorëzuar mandatin e deputetit pasi nga nesër, i përkushtohem një projekti të së drejtës ndërkombëtare private në një network në Ballkan, projekt që është afatgjatë dhe kërkon që vendimin ta marr sot", ka deklaruar Halimi. Ish- ministri i Drejtësisë, gjatë qeverisjes së djathtë, nuk ka harruar të falënderojë për besimin e dhënë ish- kryeministrin Sali Berisha dhe kreun e PD, Lulzim Basha. "Dua të falënderoj Sali Berishën, që më dha mundësinë të kontribuoj në jetën politike të vendit në këto vite. Falënderoj Lulzim Bashën, për besimin në detyrat politike prej 2013, për bashkëpunimin e shkëlqyer në këto vite dhe për mirëkuptimin në çdo vendim, prej ditës së parë e deri më sot. Falënderoj të gjithë kolegët e nderuar të Grupit Parlamentar, për gjithë bashkëpunimin në këto vite në politikë. Së bashku ne i bëmë një shërbim të madh vendit me paketën ligjore të dekriminalizimit dhe paketën kushtetuese të drejtësisë, në 22 korrik 2016. Falënderim dhe mirënjohje për gjithë votuesit e PD në qarkun e Durrësit dhe Beratit, që më zgjodhën 3 herë deputet të Kuvendit. Kontributi im në Partinë Demokratike do të vijojë përgjatë gjithë jetës sime, si një anëtar i thjeshtë dhe i përkushtuar", sqaron Halimi.
LARGIMI Vendimi i largimit të Eduard Halimit nga politika ak- tive vjen në një kohë kur gjithë ekipi i juristëve të Partisë Demokratike janë angazhuar për të denoncuar në mënyrë të vazhdueshme kapjen e drejtësisë nga Kryeministri Rama dhe qeveria e tij. Halimi, në të njëjtën kohë, mbante detyrën e nënkryetarit të Komisionit të Ligjeve dhe ishte një nga oponentët e fortë brenda demokratëve, për çdo nismë ligjore që qeveria sillte në Parlament. Nëse u rikthe- hemi mbledhjeve të Grupit Parlamentar të një muaji më parë, kujtojmë se Halimi ishte protagonisti kryesor i një diskutimi të gjatë me kreun e PD, në lidhje me vendimet që opozita duhet të merrte përballë kësaj qeverie dhe një Kryeministri si Edi Rama. Në mbledhjen e zhvilluar në 9 janar të këtij viti, Halimi i kërkoi Bashës që deputetët e PD- së të djegin mandatet parlamentare pasi maxhoranca po uzurpon çdo institucion. "Nëse në diskutim janë opsionet për bojkot apo djegie të mandateve, unë personalisht do të isha për opsionin e propozuar nga doktor Berisha, që është ai për djegien e mandateve. Ato që ndodhën në Parlament, me bllokimin e foltores kur do të fliste Berisha dhe kapjen e drejtësisë me zgjedhjen e një Kryeprokurori të njëanshëm, ishin pa dyshim ngjarje të rënda. Por një bojkot do të ishte i dëmshëm për PD", deklaroi Halimi në atë mbledhje. Në të njëjtën mbledhje, nënkryetari i Komisionit të Ligjeve kundërshtoi idenë e hedhur në grup për bojkot të komisioneve Ad- Hoc, për përzgjedhjen e anëtarëve të organeve të reja të drejtësisë. "Bojkoti që mund t'i bëhet Reformës në Drejtësi është i dëmshëm pasi e favorizon kundërshtarin, duke ia lënë atij tërësisht rrugën të lirë për kapjen e plotë të drejtësisë", deklaroi Halimi një muaj më parë, në Grupin Parlamentar të PD.