Marku në Vlorë: Kapni organizatorët e drogës, jo vetëm korrierët

“Policia të mos ngutet me operacionet, duhet verifikim dhe sekuestrim i pasurive që mund të lidhen me drogën”

Prokurorja e Përgjithshme e përkohshme, Arta Marku, ishte ditën e djeshme në Vlorë, për analizën e organit të Akuzës atje.

Marku dha një apel të rëndësishëm, si për Prokurorinë, ashtu edhe për Policinë e Vlorës. Ajo tha se nuk duhen arrestuar vetëm shpërndarësit, kultivuesit apo përdoruesit e drogës, por edhe organizatorët dhe financuesit e saj. “Duhet mosngutje në përfundimin e operacioneve të organizuara në luftën kundër drogës, duke vënë në pranga shpesh vetëm konsumatorët, shpërndarësit e vegjël, korrierët apo mjetet e transportit, por bërja e përpjekjeve dhe shfrytëzimi i çdo metode të mundshme ligjore, hetimi dhe shfrytëzimi i bashkëpunimit ndërkufitar dhe ndërkombëtar, për të mundësuar identifikimin, kapjen me qëllim vënien para drejtësisë të organizatorëve të grupeve kriminale”, tha Kryeprokurorja e përkohshme në takimin me prokurorët e Vlorës. Sipas saj, Vlora është një prej vendeve më të njohura të prodhimit të kanabisit, por edhe i drogave të tjera, si edhe vend i rëndësishëm transiti, rrugët detare të së cilës lidhen me vendet e BEsë. Marku propozoi një forcim të bashkëpunimit mes Policisë, asaj kufitare dhe autoriteteve doganore, që të frenohet trafikimi ndërkombëtar i lëndës narkotike. “Vlora, tashmë prej kohësh, njihet si një vend prodhues i kanabisit, jo aq i drogave të tjera sintetike, por edhe si një vend i rëndësishëm transiti për në vendet e Europës, specifikisht favorizuar nga linja e gjatë bregdetare. Duhet forcim i bashkëpunimit mes Policisë, autoriteteve Policore Kufitare dhe autoriteteve Doganore, me qëllim frenimin e trafikimit, identifikimin, gjetjen dhe vënien para drejtësisë të shkelësve të ligjit. Duhet koordinim i veprimeve mes të gjithë aktorëve në luftën kundër narkotikëve dhe shkëmbim i informacionit në kohën e duhur, me shpejtësinë dhe cilësinë e duhur mes tyre”, tha ajo më tej. Kryeprokurorja pranoi në takim se droga nuk kultivohet dhe trafikohet pa ndihmën e zyrtarëve publikë. Sipas saj, përfaqësuesit e pushtetit vendor duhet të sinjalizojnë autoritetet kur kanë të dhëna për kultivim kanabisi. “Veprimtaria kriminale në fushën e narkotikëve nuk zhvillohet e vetme, pa mundësinë e korruptimit edhe të zyr- tarëve publikë, në hallka kyçe të strukturave të shtetit. Kjo, duke nisur që nga përfaqësuesit e pushtetit vendor, që hezitojnë të sinjalizojnë kur konstatojnë mbjelljen e bimëve narkotike në territorin e njësisë administrative, ashtu edhe të funksionarëve të tjerë, që mund të ofrojnë kundrejt korrupsionit, ndihmën e tyre në hallkat që përbëjnë zinxhirin e trafikimit të lëndëve narkotike.

Zhvillim të hetimit, duke nisur nga identifikimi i pasurisë në drejtim të gjetjes së burimit, veprimtarisë kriminale”, tha ajo më tej. Kryeprokurorja vuri theksin edhe te pastrimi i produkteve të veprave kriminale, duke thënë se është me rëndësi që të sekues- trohen apo konfiskohen bizneset dhe pronat, që janë vënë me para droge ose të pajustifikuar. Ajo preku edhe një çështje tjetër, atë të falsifikimit të dokumenteve, sidomos ato që lidhen me pronën. “Vlora karakterizohet nga falsifikimi masiv i dokumenteve, për vetë pozicionin gjeografik dhe interesin e madh të tokave me destinacion turistik, me qëllim shtënien në dorë të pasurive që i përkisnin shtetit apo të tretëve. Kjo bëhet evidente edhe në sekuestrimet e vendosura mbi pasuri të ndryshme të paluajtshme dhe të luajtshme. Të verifikohen dhe hetohen deri në origjinë, transaksionet e kryera mbi pronat”, përfundoi Marku.