IKMT nis shembjen e lokaleve në plazhin e Golemit
Pronari i lokalit: Na dhanë afat vetëm dy orë, kemi leje
DURRES - Fadromat dhe mjetet e rënda të IKMT do të shembin objektet e ngritura përgjatë vijës bregdetare në Durrës. Shembja ka nisur të premten në mbrëmje, në vijën bregdetare, në zonën e Shkëmbit të Kavajës dhe Golemit. Paraprakisht, bëhet fjalë për shtatë objekte, kryesisht bar- restorante, të cilat janë ngritur në brezin e pishave dhe brezin e rërës në vijën bregdetare. Të mbështetur edhe nga forcat e rendit, IKMT hasi në kundërshtimin e pronarëve të objekteve, të cilët pretendojnë se janë konform ligjit, me dokumentacion të rregullt dhe leje ndërtimi nga bashkia. Edhe pse ka pasur një urdhër të mëparshëm, pronarët e këtyre bizneseve kanë kundërshtuar punonjësit për prishjen e objekteve të tyre. Por, ka zgjatur shumë pak rezistenca e tyre, pasi fadromat marshuan drejt objekteve të ndërtuara kryesisht me skelete druri, duke i rrafshuar në harkun e pak minutave. Sipas banorëve, pas këtij aksioni qëndron Kryeministri pasi në këtë zonë, sipas tyre, gjendet një vilë qeveritare. Pronarët pretendojnë se kanë leje nga bashkia dhe institucionet e tjera për të ushtruar aktivitetin e tyre, ndërsa akuzojnë se nuk u është lënë afat. “Kemi leje ndërtimi, bashkie dhe të gjitha të tjerat. Pas këtyre lokaleve ndodhen vilat e Ramës, ka nevojë për diell, prandaj po shemben objektet. I kemi me letra, me të gjitha, nuk na kanë dhënë asnjë shpjegim. Aksioni filloi të mërkurën dhe nuk na u dha njoftimi, duhet të paktën një javë që të merren masat. Në mëngjes na thanë nuk do të shembet dhe tani na dhanë afat dy dorë” deklaroi Shkëlqim Dervishi, njëri nga pronarët e bizneseve. Ndërkohë që IKMT ka reaguar për situatën e krijuar, duke sqaruar se po prish ndërtimet e bëra rishtas në Golem dhe se përgjegjësit do të paditen. IKMT deklaron se lokalet dhe restorantet janë ngritur në rërë, ndërsa janë brenda fashës së mbrojtur nga bregu. “Janë objekte të ngritura në brezin e rërës brenda fushës së mbrojtur. Ndër- tues, mos ndërmerrni iniciativa antiligjore. Ka dokumentacione të dyshimta, të dhënat nga zyrtarët e Bashkisë dhe ministrisë, do verifikohen. Këta zyrtarë do të mbajnë përgjegjësi ligjore, që kanë lëshuar këto dokumentacione. Do bëhet spastrim i zonës. Pa favorizuar askënd. Edhe ata që janë me leje. Le të përgjigjen bashkitë, si i kanë dhënë këto leje. Nuk është puna jonë kjo. Janë institucionet kompetente, që do merren me hetimin se si janë marrë këto leje ndërtimi. Ne zbatojmë detyrën”, deklaroi IKMT. l. m