Krenar për Ermal Metën? Opinioni ndahet në mes
Patozi: Suksesi individual i njeriut, të rritur në perëndim
Fitorja e Ermal Metës në festivalin e Sanremos u trumbetua nga shumica e shqiptarëve si "fitorja e një shqiptari".
Rrjetet sociale u mbushën me statuse, linqe e fotografi të fituesit, duke shprehur krenarinë që një shqiptar fitoi festivalin aq të ndjekur, sidomos para viteve ' 90, atë të Sanremos. Sigurisht, Ermal Meta nuk e ka mohuar asnjëherë origjinën e tij shqiptare, madje ka dalë fotografi edhe duke bërë me duar shqiponjën dykrenore, por Ermal Meta është produkt i një pune individuale. Për më shumë se 15 vjet ai punon, krijon, eksperimenton, merr pjesë nëpër festivale, edhe pse shumë herë nuk ka arritur deri në finish. Dhe më në fund ia doli të dalë në krye, duke bashkëpunuar me këngëtarët e kompozitorët më në zë në Itali, për t'u bërë një vit më parë një nga emrat më të lakuar të muzikës italiane dhe i njohur edhe në Shqipëri. Ndërsa këtë vit, ai përbën kulmin e krenarisë së shqiptarëve. Janë të panumërt mesazhet për talentin që triumfon në vendin e mundësive, ndërkohë që në Shqipëri askush nuk do t'ia kishte dhënë mundës- inë dhe as të drejtën. I kanë shprehur urime muzikantë e njerëz të thjeshtë, por nuk kanë munguar edhe politikanët, që nga Sali Berisha, Jozefina Topalli e Lulzim Basha, madje ky i fundit e ka parë si një dritë shprese në një kohë kur vendi udhëhiqet nga "trafikantë e banditë". Kundër këtij patriotizmi që ngre krye sa herë bëhet fjalë për suksesin e ndonjë shqiptari jashtë vendit është shprehur ish- deputeti i PD- së, Astrit Patozi, sipas të cilit nuk na takon të jemi edhe aq shumë krenarë për Ermal Metën, i cili është produkt i Perëndimit. "Ermal Meta është suksesi individual i njeriut të zot, të rritur dhe formuar në perëndim, por që mbi të gjitha ka përfituar nga hapësirat e lirisë që ai ofron, pavarësisht origjinës, racës, fesë apo bindjeve politike", shkruan Patozi.
Pas fitores së Ermal Metës do të jenë dy këngëtarë me gjak shqiptar në skenën e festivalit europian, në muajin maj: Eugent Bushpepa, që përfaqëson Shqipërinë dhe Meta, që përfaqëson Italinë.