Largimi i Llallës para Vetingut, ambasadori Lu: S’përjashtohet nga hetimet
PD kërkon komision hetimor për Tahirin
Kryeministri Edi Rama, ish- ministri i Brendshëm Saimir Tahiri, ministrja e Drejtësisë Etilda Gjonaj, ish- Drejtori i Përgjithshëm i Policisë së Shtetit Haki Çako do të dëshmojnë në Kuvend për kanabizimin e vendit dhe veprimet e ndërmarra nga qeveria për luftimin e këtij fenomeni.
Partia Demokratike ka depozituar në Kuvend kërkesën për ngritjen e një Komisioni Hetimor për të kontrolluar ligjshmërinë e veprimeve administrative të organeve të pushtetit legjislativ apo ekzekutiv në çështjen për të cilën akuzohet ish- ministri i Brendshëm z. Saimir Tahiri. Objekt i komisionit të kërkuar nga PD, do të jenë edhe ndërhyrjet që janë bërë për të mos lejuar organin e Prokurorisë të hetojë penalisht këto raste. Në kërkesën e dorëzuar në Kuvend nga PD dhe të siguruar nga “Panorama”, sqarohen edhe çështjet që do të hetohen nga Komisioni Hetimor që do të drejtohet nga opozita. Moslejimi i arrestimit të ish- ministrit Tahiri nga maxhoranca dhe ligjshmëria e veprimeve të ndjekura nga anëtarët e maxhorancës dhe Këshilli i Ministrave do të jenë në fokusin kryesor të komisionit. Ndonëse lista e personave që do të merren në pyetje nga komisioni do të miratohet në mbledhjet e para, burime pranë Partisë Demokratike sqarojnë se do të kërkohet dëshmia e zyrtarëve më të lartë të qeverisë, duke nisur nga Kryeministri Rama.
HETIMI
“Verifikimi i ligjshmërisë dhe efekteve të vendimit administrativ të Kuvendit për pengimin e organit të Prokurorisë që të kërkonte në Gjykatë arrestimin e ish- ministrit të Brendshëm z. Saimir Tahiri, si dhe nxjerrja e provave që përbëjnë sekret hetimor nga anëtarët e Këshillit; Veprimet dhe sjellja e Kryeministrit dhe anëtarëve të tjerë të Këshillit të Ministrave, si dhe e çdo zyrtari tjetër publik, në pengimin apo intimidimin e organit të Prokurorisë, që të veprojë në mënyrë të pavarur dhe paanshme në hetimin e çështjes penale ndaj ish- ministrit të Brendshëm z. Saimir Tahiri; Arsyet e veprimeve dhe sjelljes së Kryeministrit dhe anëtarëve të tjerë të Këshillit të Ministrave në intimidimin e organit të Prokurorisë mbi këtë hetim penal dhe vlerësimi i rrethanave mbi dijeninë e tyre për veprimtarinë kriminale apo ligjshmërinë e veprimtarisë së tyre shtetërore në çështjen, për të cilën akuzohet ish- ministri i Brendshëm z. Saimir Tahiri, si dhe roli apo përgjegjësia e institucioneve shtetërore në parandalimin dhe ndëshkimin e fenomenit të kultivimit të kanabisit apo trafikimit të lëndëve narkotike; Ndërhyrjet nga organet e pushtetit legjislativ apo ekzekutiv në hetimin e kësaj çështje, si dhe efektet që kanë sjellë këto ndërhyrje”, thuhet në kërkesën e demokratëve. Gjithashtu, komisioni do të hetojë edhe procedurat e ndjekura për ekstradimin në Itali të Nezar Seitit, për të cilin pritet të thërrasin për të dëshmuar ministren e Drejtësisë Etilda Gjonaj dhe drejtorin e Përgjithshëm të Burgjeve, Arben Çuko. “Evidentimi i pengesave, që ka hasur organi i Prokurorisë në hetimin e këtij zyrtari të lartë, nga veprime apo mosveprime të paligjshme të organeve të tjera të administratës shtetërore; Ligjshmëria e ekstradimit të personit tjetër nën hetim për të njëjtën çështje dhe efektet që sjell ky ekstradim në ushtrimin e ndjekjes penale ndaj ish- ministrit të Brendshëm; Rreziqet që paraqiten për hetimin e pavarur, të shpejtë, efikas dhe të gjithanshëm të kësaj çështje dhe mjetet që duhet të përdoren për eliminuar në mënyrë kushtetuese dhe ligjore këto rreziqe; Vlerësimi mbi nevojat e organit të Prokurorisë për burime financiare dhe njerëzore, për hetimin e plotë, të pavarur dhe të paanshëm, të kësaj çështjeje, si dhe verifikimi nëse këto burime janë vënë në dispozicion”, do të kërkojnë të hetojnë demokratët.