Xhafaj- Avramopulos, marrëveshje për kontrollin e kufirit e drogën
Roja bregdetare shqiptare dhe pikat e kalimit kufitar do të bashkëpunojnë me shërbimet e Frontex- it, që pritet të mbërrijnë së shpejti në Shqipëri, pas marrëveshjes që u nënshkrua dje mes komisionarit Dimitris Avramopulos dhe ministrit të Brendshëm, Fatmir Xhafaj. Roja bregdetare kufitare e BE- së do ndihmojë në parandalimin e trafikut të drogës drejt vendeve të Unionit. Shqipëria dhe Komisioni Europian ratifikuan marrëveshjen për sigurinë e kufijve dhe mundësinë që do të ketë Tirana zyrtare për të aplikuar për fonde në Bruksel lidhur me luftën kundër drogës. Marrëveshjet u firmosën dje gjatë vizitës së komisionerit të KE- së për Sigurinë dhe Çështjet e Brendshme, Dimitris Avramopulos dhe ministrit të Brendshëm, Fatmir Xhafaj. Bashkimi Europian ratifikoi me Shqipërinë marrëveshjen për menaxhimin dhe kontrollin e kufijve, kjo edhe në kuadër për të parandaluar trafikun e drogës drejt vendeve të BE- së. Gjatë konferencës së përbashkët për shtyp, minsitri Xhafaj theksoi se kjo marrëveshje rrit sigurinë e kufijve, ndërkohë Avramopulos, vuri theksin te abuzimi me liberalizimin e vizave. “Kjo marrëveshje do të mundësojë që në të ardhmen të vendosen në Shqipëri ekipe nga Agjencia Europiane e Kufirit dhe Rojës Bregdetare. Në fakt, siglimi i kësaj marrëveshjeje shënon edhe fundin e negociatave. Marrëveshja do të firmoset në mënyrë zyrtare diçka më vonë, mbasi të dyja palët të kenë përfunduar procedurat e tyre ligjore të brendshme. Kjo është marrëveshja e parë dhe ne shpresojmë që të përmbyllim së shpejti marrëveshje të ngjashme, të cilat aktualisht janë duke u negociuar me Serbinë, ish- Republikën Jugosllave të Maqedonisë dhe me aktorë të tjerë kyç në të ardhmen. Duhet të ulni numrin e atyre personave që abuzojnë me liberalizimin e vizave sepse besoj që të gjithë ne duam ta ruajmë dhe ta kemi procesin e liberalizimit të vizave”, u shpreh Avramopulos.