Trafiku i 11.4 kg heroinë, dyshime për implikim të punonjësve të portit

DURRES- Pas sekuestrimit të 11.4 kg heroinë në Portin e Durrësit, Policia është duke hetuar veç të tjerash, edhe për mundësinë e një bashkëpunimi të brendshëm. Kjo do të thotë se nuk përjashtohet dyshimi se i arrestuari të ketë pasur mbështetjen e efektivëve në port, por gjithçka është shkatërruar kur këta të fundit kanë nuhatur operacionin e antidrogës. Burime nga grupi hetimor bënë të ditur se 63- vjeçari durrsak, Bujar Shazivari, po mbahej nën përgjim, pasi agjentët e Antidrogës në Durrës kishin informacione se ishte përfshirë në një grup kriminal të trafikut ndërkombëtar të lëndëve narkotike. Pavarësisht se ai nuk ka pranuar të ketë lidhje apo dijeni për lëndën narkotike të zbuluar në kamionin që drejtohej prej tij, hetuesit dyshojnë se është bashkëpunëtor në trafikimin e saj. Shazivari mësohet të jetë pronar i një kompanie konfeksionesh në zonën e Spitallës në Durrës. Por ai nuk po transportonte produktet e kompanisë së tij, por për llogari të një kompanie tjetër. Ndryshe nga herët e tjera, kur shoferët nuk kanë mbajtur përgjegjësi, këtë radhë situata është krejtësisht ndryshe pasi droga është gjetur në kabinën e kamionit dhe jo brenda në ngarkesë. “Shazivari po mbahej nën përgjim nga Policia pasi agjentët e Antidrogës kishin siguruar në rrugë operative se po bashkëpunonte me një grup kriminal, që vepronte në trafikun ndërkombëtar të lëndëve narkotike. Ai ka mohuar të këtë dijeni për ekzistencën e heroinës në kamion. Por kjo përgjegjësi bie në rastin e tij, pasi drejtuesi i kamionit nuk ka përgjegjësi vetëm në rastin kur lënda narkotike gjendet në ngarkesë, e cila plumboset dhe pastaj ngarkohet në kamion, i cili merret përsipër më pas nga shoferi, që ka detyrë ta dërgojë në destinacion. Pranon apo s’pranon, Shazivari është i implikuar, pasi në këtë rast lënda narkotike ndodhej në kabinën e kamionit dhe konkretisht, nën krevatin e shoferit”, bëri të ditur Policia.