KRYEMINISTRI

Marrëdhënia e tensionuar midis Turqisë dhe SHBA është në një pikë ku ose mund të rregullohet, ose mund të prishet fare.

Kështu është shprehur ministri i Jashtëm, Mevlut Cavusoglu, duke folur përpara vizitës së Sekretarit amerikan të Shtetit, Rex Tillerson, në Ankara këtë javë. “Lidhjet me Shtetet e Bashkuara janë në pikë shumë kritike. Ne do t’i rregullojmë këto marrëdhënie ose do të thyhen plotësisht”, u tha ministri gazetarëve në Stamboll. Ai shtoi se SHBA duhet të hedhë hapa konkretë për të rivendosur besimin e humbur. “Arsyeja për humbjen e besimit është SHBA”, tha Cavusoglu. Tillerson pritet të vizitojë Turqinë më 15 dhe 16 shkurt gjatë turneut të tij në Lindjen e Mesme, ku do të zhvillojë bisedime me Cavusoglun dhe Presidentin Recep Tayyip Erdogan. Paralelisht, më 15 shkurt do të takohen edhe Sekretari amerikan i Mbrojtjes, Jim Mattis dhe ministri turk i Mbrojtjes, Nurettin Canikli, në Bruksel, në takimin ministror të NATO- s. Aleanca mes dy forcave më të mëdha të NATO- s është vënë në pikëpyetje të madhe për shkak të operacionit “Dega e Ullirit” që kanë nisur trupat turke në Afrin, në territorin sirian kundër milicive kurde, që i konsiderojnë terroristë. Të njëjtat njësi janë të përkrahura nga SHBA, pasi konsiderohen aleatë në luftën kundër ISIS. Nga ofensiva në Afrin, trupat turke mund të kalojnë në Manbij, ku janë të pozicionuar trupat e SHBA- ve përkrah militantëve të YPG. Çavusoglu tha se YPG ka lënë të lirë një sërë militantësh të ISIS të arrestuar në Afrin, me kushtin që ata të luftojnë kundër Turqisë. Turqia kërkon që SHBA- të ta ndërpresin bashkëpunimin me YPG dhe të ndalojë të gjitha dërgesat e armëve dhe pajisjeve ushtarake ndaj këtij grupi, duke këmbëngulur në tërheqjen e militantëve të YPG nga Manbij, në lindje të Eufratit, siç u premtua nga administrata e SHBA- ve, që prej vitit 2016. SHBA e sheh YPG si një forcë efikase lokale kundër ISIS dhe e ka bërë të qartë se partneriteti do të vazhdojë derisa grupi të eliminohet plotësisht. Ndërkohë, kryebashkiaku i kryeqytetit turk, Ankarasë, tha të hënën se kishte miratuar riemërimin e rrugës jashtë Ambasadës së SHBA- ve si rruga “Dega e Ullirit”, emri që Turqia përdor për fushatën e saj të vazhdueshme ushtarake në Siri. Propozimi i kryebashkiakut Mustafa Tuna do të miratohet me shumicë në Këshillin Bashkiak përpara se Sekretari Tillerson të vizitojë Ankaranë, të enjten. Kryeministri turk, Binali Yýldýrým, tha se “Terrorizmi është kërcënimi më i madh për ne. Aleanca jonë e NATO- s dhe partneri afatgjatë strategjik duhet të marrin një vendim të shëndoshë. Vendimi i Amerikës për të luftuar kundër një organizate terroriste, nëpërmjet bashkëpunimin me një organizatë tjetër terroriste, nuk ka të bëjë me dinjitetin e një shteti”, tha Yýldýrým para gazetarëve. Sipas tij, “Ankaraja nuk do të angazhohet kurrë në ujdi të pista”. Yýldýrým u zotua se Turqia do të vazhdojë të hedhë të gjithë hapat e nevojshëm për të siguruar kufijtë e saj dhe qytetarët dhe se operacionet do të vazhdojnë në Afrin dhe gjetkë, derisa të ketë siguri të plotë.