Tabaku: Pastrimi i parave është ngritur në sistem

“Korrupsioni dhe pastrimi i parave në Shqipëri janë ngritur në sistem.” Kështu ka deklaruar nënkryetarja e Komisionit të Ekonomisë, deputetja e PD- së, Jorida Tabaku, sot gjatë takimit të Komitetit të Stabilizim Asociimit. Sipas Tabakut, të dhënat e fundit zyrtare nga Zyra e Prokurimeve Publike tregojnë se qeveria shqiptare ka kryer pothuajse 30% të tyre me prokurim të drejtpërdrejtë, ndërkohë që nga 9613 procedura, 3318 janë me negocim pa shpallje. Tabaku tha se këto janë kontrata që i jepen në mënyrë të drejtpërdrejtë një personi të vetëm, të lidhur me qeverinë. Duke cituar strategjinë e zgjerimit, Tabaku nënvizoi pjesën ku thuhet se prokurimet publike që shkojnë te klientët e caktuar të qeverive të vendeve të Ballkanit Perëndimor, janë një nga elementët kryesorë të korrupsionit qeveritar. “Në qoftë se ka një fushë që opozita dhe maxhoranca mund të ulen bashkë për të hartuar një strategji të përbashkët për integrimin europian, kjo është lufta ndaj korrupsionit”, u shpreh Jorida Tabaku.