"Veliera", Gjykata vendosi pro projektit 6 milionë USD
"Nuk do të lejohen punimet në zonën A, do të ruhen rrënojat"
Gjykata Administrative e Durrësit i hapi rrugën dje projektit 6 milionë dollarësh për ndërtimin e "Velierës".
Pas disa seancave u pranua pjesërisht kërkesëpadia e Shoqërisë Civile, e cila kërkonte anulimin e projektit të bashkisë. Gjykata Administrative vendosi që t'i hapë rrugë përfundimit të veprës në sheshin para hyrjes së portit sipas projektit të rishikuar nga Ministria e Kulturës dhe Bashkia e Durrësit, pas 13 seancave dhe një viti pezullim punimesh. Ndryshimet në projekt parashikojnë ruajtjen dhe punimet në hapjen për publikun të rrënojave arke- ologjike të zbuluara gjatë punimeve për këmbët e "Velierës". Ndërkohë, sipas vendimit, nuk do të lejohen të zhvillohen punimet në zonën arkeologjike "A". Sakaq, nuk u pranua kërkesa për përgjegjësinë penale për urdhëruesit e tij. Seanca u shoqërua nga një moment tensioni pasi vendimi u dha pa praninë e medias.
"Veliera" cilësohet si një nga projektet madhore të Bashkisë së Durrësit, sipas së cilës qyteti fiton një shesh për qytetarët dhe po ashtu do të tërheqë interesin e turistëve të huaj. Në këto kushte, pas një viti pezull, Gjykata i ka hapur rrugë punimeve në kantierin e ndërtimit, përveç zonës arkeologjike "A". Treshja e gjyqtarëve e kryesuar nga Ergys Gashi ka pranuar pjesërisht kërkesëpadinë e Shoqërisë Civile, e cila kërkonte anulimin e projektit të këtij sheshi dhe vënien para përgjegjësisë të autorëve, që kanë ndërhyrë në zonën arkeologjike. Gjykata Administrative në vendimin e saj ka pranuar projektin e ndryshuar të paraqitur nga Ministria e Kulturës dhe Bashkia e Durrësit për të mos u zhvilluar punime në zonën arkeologjike "A", aty ku binte më parë një nga këmbët e "Veli- erës". Pra, do të zbatohet projekti i ndryshuar, që konsiston në ruajtjen e rrënojave arkeologjike në kushte optimale dhe njëkohësisht të jenë të vizitueshme nga publiku. Gjykata Administrative nuk është shprehur për kërkesëpadinë e shoqërisë civile në lidhje me anulimin e projektit, por vendosi që të mos lejojë punime në zonën "A", aty ku punimet janë të bllokuara prej një viti. Menjëherë pas këtij vendimi, kanë reaguar edhe përfaqësuesit e shoqërisë civile, avokatja Mirela Jorgo dhe ambientalisti Sazan Guri, të cilët u shprehën se do ta çojnë çështjen në Strasburg për të mbrojtur vlerat e trashëgimisë kulturore.