Prokuroria thërret për dëshmi biznesmenin Nuel Kalaj
Prokuroria e Tiranës ka thirrur për të dëshmuar për privatizimin e OSSH- së, biznesmenin Nuel Kalaj. Ky i fundit akuzohet nga për ushtrim të ndikimit të paligjshëm ndaj personave që kryejnë funksione publike. Sipas raportit të Komisionit Hetimor Parlamentar për CEZ, Nuel Kalaj ka luajtur rolin e sekserit në privatizim dhe ka përfituar një shumë të madhe parash. Mirëpo, biznesmeni nuk gjendet në banesën e tij në Tiranë. Burimet pranë Prokurorisë së Tiranës thonë se për të janë dërguar dy fletëthirrje, për të dëshmuar në Prokurori, por pa përgjigje. Dyshohet se Kalaj nuk gjendet më në Shqipëri, pasi ai nuk dëshmoi as gjatë kryerjes së punimeve të Komisionit Hetimor Parlamentar, ku u thirr si dëshmitar. Kalaj është emri i tretë që thirret nga Prokuroria e Tiranës për të dëshmuar, pas djalit të ish- Kryeministrit Berisha, Shkëlzen Berisha dhe ish- ministrit të Ekonomisë, Genc Ruli. Këta të dy kanë dhënë dëshmitë e tyre në Prokurori dy javët e fundit, ndërsa të tjerë zyrtarë priten që të thirren për të dëshmuar. “Panorama” mëson se Prokuroria e Tiranës ka gati edhe një letërporosi për autoritetet çeke në lidhje me dosjen, ku kërkon më shumë material. Për privatizimin e CEZ, Komisioni Hetimor Parlamentar ka vlerësuar se dëmi i shkaktuar ndaj shtetit shqiptar, kap vlerën e 414 milionë eurove. Komisioni ka bërë kallëzim penal ndaj disa ish- zyrtarëve të lartë për CEZ, përfshirë edhe ndaj ish- Kryeministrit Berisha.