KORÇË/ Marku: Hetoni zyrtarët, ka vetëm 1 kallëzim
KORÇË – Prokurorja e Përgjithshme Arta Marku, gjatë zhvillimit të analizës vjetore të Prokurorisë së Korçës, kërkoi vëmendje te rrjetet e trafikut të drogës dhe rastet e korrupsionit të nëpunësve shtetërorë të doganave dhe tatimeve, ku sipas saj në Korçë për vitin 2017 është regjistruar vetëm një kallëzim. “Prokurorët të jenë më të angazhuar dhe fokusuar te hetimi i veprave penale me rrezikshmëri të theksuar dhe sensitive për rrethin Korçë. Mbështesim prokurorët për hetime në lëndën e korrupsionit. Prokuroria të mos mbetet vetëm me goditjen e shpërndarësve të lëndëve narkotike, por të identifikojë dhe vendosë përpara përgjegjësisë penale grosistët, grupet që financojnë dhe organizojnë kultivimin e lëndëve narkotike, trafikimin etj”, ka deklaruar Marku. Prokurorja e Përgjithshme, gjithashtu kërkoi edhe hetim ndaj zyrtarëve shtetërorë, që abuzojnë me ligjin apo që janë të korruptuar. “Mbështesim fuqimisht prokurorët për të identifikuar shkelje të ligjit dhe regjistrimin e veprave penale, sidomos në mënyrën e ushtrimit të pushtetit nga nëpunësit publikë”, shtoi ajo duke kërkuar analiza të përbashkëta me organet tatimore dhe doganore për të identifikuar shkelje të ligjit në këto fusha. dh. ç