Dhjetëvjetori i Kosovës, ndahen 600 mijë euro për festën

Më 17 shkurt, Kosova feston dhjetëvjetorin e pavarësisë së saj, një ngjarje që pritet të ketë një organizim dinjitoz nga autoritetet e republikës më të re në Europë. Qeveria e Kosovës ka ndarë 600 mijë euro për aktivitetet e 10- vjetorit të pavarësisë. Mes këngëtarëve të ftuar për festën është edhe ylli ndërkombëtar Rita Ora, me origjinë nga Kosova, e cila nuk ka pranuar të paguhet për këtë eveniment, por do të këndojë falas. Ndërkohë, qeveria e Kosovës ka miratuar edhe ndryshime të tjera. Këshilli organizativ për shënimin e përvjetorit të dhjetë të pavarësisë së Kosovës ka hequr flamurin kombëtar shqiptar te zona e përkufizuar si “Rrethi” në Prishtinë dhe do të vendosë flamurin e Republikës së Kosovës, sipas disa raportimeve lokale. Raportime të tjera flasin për ven- dosjes paralele të dy flamujve, atij kombëtar dhe atij të Kosovës. Gjatë mbrëmjes, forca të shumta policie kanë qenë të pranishme në vendngjarje, ku vetëm pak pasi Kryeministri Haradinaj mori vendimin, u kontaktua kompania që do të merret me punimet, madje puna, për çudi, nisi që në mbrëmje, sipas mediave lokale. Vendimi i Haradinajt u mor pasi kryetari i Bashkisë së Prishtinës, Shpend Ahmeti, tha se nuk është në përgjegjësinë e tij vendosja e flamurit të Kosovës në këtë lokacion. “Nuk ka qenë asnjëherë përgjegjësi e komunës së Prishtinës”, ishte shprehur Ahmeti. Flamuri kombëtar ishte vendosur nga aktivistët e Lëvizjes Vetëvendosje në atë vend, pasi ai ishte zgjedhur në krye të Komunës së Prishtinës. Më parë, aty qëndronte flamuri i Republikës së Kosovës.