Ajri i ndotur, Gjermania propozon transport publik falas
Gjermani po gjen mënyra për të luftuar ndotjen e ajrit, e vendosur nën kritikat e BE- së, duke propozuar një transport publik falas për të inkurajuar njerëzit që të mos përdorin makinat e tyre, duke reduktuar kështu emetimet e dyoksidit të azotit dhe lëndën e grimcave. Qeveria gjermane tha se po shqyrton një plan që do ta bënte transportin publik falas në qytetet më të ndotura, sipas një letre të parë nga mediat gjermane, të martën. Letra e dërguar për Komisionerin Europian për Mjedisin, Karmenu Vella në Bruksel, u drejtua nga ministrja gjermane e Mjedisit Barbara Hendricks, ministri i Bujqësisë Christian Schmidt dhe shefi i zyrës së kancelarisë Peter Altmaier, sipas “Deutsche Welle”. Qeveria gjermane përzgjodhi pesë qytete për të hapur programin e transportit falas: Bonn, Essen, Reutlingen, Mannheim dhe Herrenberg. Në letër është pro- pozuar vendosja e zonave të ulëta të emetimit për automjetet e mëdha transportuese, duke rritur numrin e taksive elektrike dhe nxitjen për përdorimin e makinave elektrike në përgjithësi. Më 22 shkurt, Gjykata Federale Administrative në Leipzig do të shqyrtojë nëse ndalimi i përdorimit të makinave me naftë është i ligjshëm. Nëse Gjykata do të mbështesë ndalime të tilla, ajri pritet të përmirësohet, por mund të goditet ashpër industria gjermane e prodhimit të makinave. Brukseli i ka dhënë Gjermanisë dhe tetë vendeve të tjera anëtare të BE një shans përfundimtar për të ofruar propozime në reduktimin e emetimeve të automjeteve dhe në përputhje me standardet e BE për cilësinë e ajrit. Nëse shefi i Mjedisit i BE- së Vella nuk është i kënaqur me propozimet e Berlinit, ai mund të paraqesë një çështje në Gjykatën Europiane të Drejtësisë.