Flamurtari kalon në gjysmëfinale, Kukësi eliminon Tiranën

Partizanit nuk mjaftojnë 2 gola për të kaluar më tej, bardheblutë ngecin në shtyllë

Panorama (Albania) - - SPORT -

Skënderbeu fitoi bindshëm edhe sfidën e kthimit ndaj Teutës, edhe pse më shumë luhej për formalitet.

Nisja e takimit ishte e vakët, por korçarët arritën të zhbllokoheshin vetëm në sekondat e fundit të pjesës së parë, gjë që i bëri të shkonin të qetë në dhomat e zhveshjes. Më pas, në të dytën erdhi edhe zhbllokimi për Ali Souen, që kishte më shumë se dy muaj pa shënuar një gol. Sulmuesi nga Mali shënoi dy herë dhe i siguroi kështu Skënderbeut gjysmëfinalen e Kupës. Por, edhe pse gjithçka ishte hipotekuar, në minutat e fundit ishte Jashanica ai që u dëmtua në gju dhe mesa duket do të mungojë gjatë për korçarët. Fitorja me rezultat të përgjithshëm 5- 0 i çon korçarët në fazën gjysmëfinale të Kupës së Shqipërisë.

PARTIZANI- FLAMURTARI

Është mbyllur me rezultatin 2- 1 sfida e dytë e 1/ 8- ve të Kupës së Shqipërisë mes Partizanit dhe Flamurtarit. Pavarësisht fitores, skuadra kryeqytetase u eliminua, për shkak të humbjes 1- 0 në takimin e parë të zhvilluar në Vlorë. Flamurtari kaloi në avantazh në pjesën e parë dhe gjërat u dukën se do të ishin shumë të lehta për vlonjatët. Por, më pas Partizani shënoi dy herë duke përmbysur gjithçka dhe më pas kualifiki- mi diskutohej sërish. Një eliminim që rëndon situatën te të kuqtë, teksa në kampionat pavarësisht projektit fillestar dhe investimeve, nuk janë në pozita për të synuar titullin. Jo vetëm kaq, por edhe Europa është një pozicion që rrezikohet nisur nga forma e skuadrave si Laçi, Luftëtari, Kamza, Flamurtari dhe Kukësi.

KUKËSI- TIRANA

Kualifikohet Kukësi. "Heroi" i verilindorëve mban të njëjtin emër si në ndeshjen e parë, atë të Sindri Gurit. Goli i shkodranit që në të 4ën minutë u ka mjaftuar të besuarve të Pakultit që të eliminojnë Tiranën dhe shkojnë në gjysmëfinale me rezultatin final 2- 1. Bardheblutë dalin kështu nga gara dhe rrjedhimisht u shuhen shpresat për të qenë pjesë e Ligës së Europës, ndaj tashmë e gjithë vëmendja do të përqendrohet te misioni "Superiore". Bora u bëri "dëm" miqve, por jo vendësve. Kukësi më në fund u kthye duke marrë një fitore të vyer pas asaj humbjeje të pësuar në kampionat.

LUFTËTARI- LAÇI

Rezultati i takimit të parë e bënte përballjen e kthimit në Gjirokastër si një formalitet që duhej zhvilluar. Në fushë ishin dy skuadra me qëllime të ndryshme: Laçi për të ruajtur kualifikimin me pjesën dërrmuese të formacionit në fushë që nga minuta e parë dhe Luftëtari që kishte rrotacion në 80% të skuadrës në startin e takimit. Raste me pikatore dhe skuadra që tentuan me aksione "shterpë" deri në momentin kur Rexhinaldo mendoi për të ndryshuar shifrat. Një gol që vulosi gjithçka dhe kurbinasit e gjejnë vetën në gjysmëfinalen e Kupës së Shqipërisë pas fitores me rezultat të përgjithshëm 4- 0.

Momenti i shënimit të golit nga Kukësi

Newspapers in Albanian

Newspapers from Albania

© PressReader. All rights reserved.