Kufiri me Greqinë, Rama: Meta të mos godasë interesin kombëtar
“Nuk dua të mendoj se Presidenti është përfshirë në ndonjë axhendë politike, pjesë e një fronti për ta dështuar këtë proces”
Kryeministri Rama vlerësoi konsultimet e Presidentit Meta për negociatat me Greqinë, por tha se nuk beson se kreu i shtetit kërkon të dështojë marrëveshjen me vendin fqinj.
“Nuk mendoj se Presidenti në këtë rast po refuzon, unë mendoj se ai ka të gjithë të drejtën e vet që ta qëmtojë me vëmendjen më të madhe këtë proces. Nuk dua të mendoj se Presidenti është përfshirë në ndonjë axhendë politike dhe është bërë pjesë e një fronti për ta dështuar këtë proces, përkundrazi besoj dhe dua të jetë kështu, që Presidenti kërkon të jetë i qartë dhe i saktë”, tha Rama, i ftuar në “Klan Kosova”, në emision me gazetarin Baton Haxhiu. Bllokimi i këtyre negociatave, sipas Edi Ramës, do dëmtonte interesin kombëtar të Shqipërisë. “Nëse ky proces do rrënohet nga një axhendë politike, po e marr hipotekisht dhe nuk besoj se do ndodhë kështu, që do ta fuste Presidentin në front kundër qeverisë, kjo nuk do të bënte problem për mbështetjen e Greqisë për negociatat, pse nuk u firmos marrëveshja e re, por do të përbënte problem për ne. Mbase ne nuk do ta kishim më mundësinë që të nënshkruanim një marrëveshje që i kthen Shqipërisë ekzaktësisht, as më shumë e as më pak, dinjitetin dhe sovranitetin e vet territorial”, tha kreu i qeverisë. Jo i kënaqur për konsultimin e kreut të shtetit me ishPresidentin Berisha, i cili për Ramën është personi që miratoi një marrëveshje, nga e cila Shqipëria dilte e humbur. “Edhe pse konsultohet me Sali Berishën, që është ai që bëri një marrëveshje kundër interesave të vendit në 2009, nuk besoj se Presidenti është pjesë e një pakti për ta dështuar këtë marrëveshje.
Kemi një moment të artë për ta finalizuar teknikisht atë që në parim është dakordësuar, palët janë dakordësuar që duhet një marrëveshje e re, e cila duhet negociuar teknikisht. Pra, jemi një hap nga finalizimi i një marrëveshjeje historike, që përcakton sovranitetin e Shqipërisë mbi territoret e veta dhe mbyll një kapitull prej 70 vjetësh të problemeve që na kanë dalë herë pas here përpara”, tha Rama. Ai i kërkoi kreut të sh- tetit që të jetë në lartësinë e një shtetari. “Të pengosh këtë, do të thotë të godasësh interesin kombëtar. Është momenti për t’u sjellë si shtet, fatkeqësisht opozita nuk e ka këtë qasje sepse duhet të verë interesin e shtetit mbi veten. Por me Presidentin ne duhet të jemi një shtet, një interes dhe një qasje. Është koha të provojmë se jemi njerëz seriozë dhe për interesat kombëtare, të tregojmë se jemi seriozë”, tha Rama. Duke folur për negociatat, Kryeministri Rama tha se Greqia ngriti vetëm problemin e varrezave të ushtarëve të rënë dhe atë të minoritetit. “Greqia nuk ka pretendime për detin, por kanë qenë për minoritetet, për vijimin e projektit të varrezave dhe ne i kemi adresuar që të dyja, me ligjin për minoritetet. Pjesa që ka të bëjë me detin, me Ligjin e Luftës, me ‘ Çështjen çame’ dhe me lehtësirat për emigrantët tanë në Greqi, i kemi ngritur ne”, tha Kryeministri Rama.