Letra e dekanëve: Të shkarkohet rektori. Qëndrimi i tij, në dëm të universitetit
Disa muaj përpara se Kryeministri Edi Rama t’u vinte ultimatum për zgjidhjen e ngërçit, pasi në të kundërt do të kishte “prerje kokash”, katër dekanë të UT- së i kishin nisur një letër ministres ku kërkonin largimin e rektorit Mynyr Koni, pasi qëndrimi i tij është në dëm të interesave të vetë universitetit. Në letrën drejtuar ministres, që në datën 16 tetor të vitit të kaluar, thuhet se Rektori Koni nuk njeh autoritetin e tij, duke marrë kompetencat e administratorit dhe të Bordit të Administrimit, ka nënshkruar kontrata furnizimi me fekste financiare, ka bllokuar pagat e punonjësve të rektoratit e ka vonuar ato të pedagogëve të Shkencave të Natyrës, si dhe ka bllokuar databazën e shërbimeve informatike. Të gjitha këto, sipas dekanëve, kanë krijuar anomali me pasoja deri në bllokimin e disa proceseve akademike dhe administrative. Dekanët thonë se në të njëjtin rezultat kanë dalë edhe institucione të larta që e kanë audituar. “Për një pjesë të problematikave, Universiteti i Tiranës është përballur dhe u është nënshtruar verifikimeve edhe nga institucione jashtë tij si Gjykata, MAS, Ministria e Financave dhe Kontrolli i Lartë i Shtetit. Të gjitha këto institucione, për aspekte të ndryshme të administrimit, për të cilat bëhet fjalë, kanë konstatuar apo vendosur se Rektori i UT ka qenë në shkelje flagrante të ligjit dhe se ai, me dashje dhe në mënyrë persistente, ka marrë kompetencat e autoriteteve të organeve të tjera, që ligji i ngarkon në ushtrimin e funksioneve konkrete”, citohet në letrën drejtuar ministres së Arsimit. Nisur nga kjo, dekanët i kërkojnë ministres një auditim të shpejtë të veprimtarive të UT- së, pezullimin e Rektorit, si dhe propozimin për shkarkim nga Presidenti.