Mbeturinat në Porto Romano, tymi pushton universitetin
Pedagogë e studentë: E pamundur të zhvillohet mësimi
Studentët, stafi pedagogjik i universitetit “Aleksandër Moisiu” dhe banorë të qytetit të Durrësit ngrenë shqetësimin për ndotjen e lartë, që vjen si pasojë e djegies së mbeturinave në vendgrumbullimin në Porto Romane.
Vendi i grumbullimit të mbetjeve të qytetit bregdetar dhe rrethinave të tij ndodhet vetëm 200- 250 metra larg nga korpusi universitar. Sipas studentëve dhe pedagogëve, i gjithë tymi me gazra toksike i mbeturinave që digjen futet në ambientet e universitetit, duke krijuar një situatë mjaft të rëndë dhe të papërshtatshme për të kryer leksion, si dhe shkakton ndotje të lartë deri ne rrezik për shëndetin e tyre. Në fakt, për këtë problem janë ankuar shpeshherë edhe qytetarët, sidomos ata që banojnë në afërsi të vendgrumbullimit të plehrave.
“Një nga problemet me të mprehta që hasim këtu në universitetin ‘ Aleksandër Moisiu’ është ndotja, që vjen si pasojë e djegies së mbeturinave në shesh të hapur. I gjithë tymi me gazra helmuese përfundon në ambientet e brendshme të universitetit, duke shkaktuar ndotje masive. Vendgrumbullimi i mbetjeve ndodhet vetëm 200250 metra larg dhe tymi përplaset këtu ( në godinën e universitetit ‘ Aleksandër Miosiu’). Këtu është e pamundur të zhvillohet në kushte normale procesi mësimor. Nëse hapim dritaret, nuk arrijmë të pikasim njëri- tjetrin si pasojë e dendësisë së tymit. Zhvillojmë mësim me dritare e dyer të mbyllura dimër- verë”, tregojnë studentet Almira Met’hasa dhe Borana Meco. Të njëjtin shqetësim kanë dhe pedagogët e këtij universiteti dhe studentëte tjerë, të cilët vuajnë pasojën e ndotjes mjedisore që shkaktohet fare pranë korpusit.
Me të njëjtën situatë përballen edhe banorët e qytetit bregdetar, sidomos ata që banojnë në zonën e ish- Kënetës dhe Spitallës, që ndodhen më pranë vendgrumbullimit të plehrave në Porto Romano. Në emër të komunitetit, Nikollë Prenga shprehet se kanë ngritur shpesh shqetësimin për ndotjen e lartë, që vjen si pasojë e djegies së mbeturinave në terren të hapur, por ankesat e tyre kanë rënë në vesh të shurdhët. “Duket me sy të lirë sesi përhapet tymi në të gjithë qytetin. Një situatë vërtet shumë e rëndë, e cila po vret në heshtje të gjithë banorët e Durrësit, por sidomos ata që banojnë në Spitallë dhe ish- Kënetë, zona të cilat ndodhen pranë vendgrumbullimit. Me dhjetëra herë e kemi ngritur si shqetësim në institucione të ndryshme, por s’kemi marrë asnjë përgjigje për këtë problem, që po shkatërron shënde- tin e të gjithë qytetarëve durrsakë, madje dhe të vetë pushtetarëve, të cilët nuk e vënë fare ujin në zjarr për këtë gjendje alarmante, që ka të bëjë me shëndetin e popullatës. Ky është një skandal i paprecedentë”, deklaron Prenga. Ndotja mjedisore është konstatuar edhe nga Shëndeti Publik, i cili me dhjetëra herë u ka rënë kambanave për zgjidhjen e kësaj situate. Durrësi konsiderohet si ndër qytetet më nivelin më të lartë të ndotjes, pasi krahas djegies së mbeturinave në terren të hapur, ndotet gjithashtu nga numri i lartë i automjeteve e kanalet e hapura të ujërave të zeza, që kalojnë përmes zonës së ish- Kënetës, si dhe pakësimi i gjelbërimit urban. Përqendrimi i grimcave PM10 dhe NO2 në Durrës, kalon standardet kombëtare dhe ato të Organizatës Botërore të Shëndetësisë. Dita- ditës rritet numri i qytetarëve të prekur nga sëmundje të ndryshme, të cilat vijnë si pasojë e ndotjes.