Thellohet skandali, UEFA: Kërcënime anonime me vdekje
“Kërkojmë dënim më të gjatë për klubin”
UEFA ka dhënë dje sinjale të qarta për atë që pritet të ndodhë me klubin e Skënderbeut.
Në një komunikatë në faqen zyrtare ( uefa. com), qeveria e futbollit europian ka denoncuar kërcënimin që po u bëhet inspektorëve të Disiplinës, që po merren me çështjen e klubit korçar. Gjithashtu, citohet se edhe vetë presidenti Aleksander Ceferin, në një kohë që UEFA ka bërë të ditur se inspektorët që kanë kryer hetimin për Skënderbeun, belgu Karl Dhont dhe spanjolli Migel Lietard Fernandez- Palasio, janë kërcënuar me jetë nga persona anonimë. Nga ana tjetër, citohet se organizmi më i lartë i futbollit do të kërkojë një dënim më të gjatë për klubin shqiptar. “Ata ( inspektorët) që po merren me këtë çështje, kanë mbështetje 100% nga unë”, ka thënë Ceferin.
KOMUNIKATA “UEFA po zhvillon aktualisht një hetim rreth përfshirjes së klubit shqiptar KF Skënderbeu në ndeshjet e fiksuara. Skënderbeu ishte ndaluar më parë nga pjesëmarrja në kompeticionet e UEFA- s për sezonin 2016- 2017 si rrjedhojë e përfshirjes në manipulime. Ky dënim u mbajt në fuqi nga Gjykata e Arbitrazhit për Sportin ( KAS). Informacione shtesë të siguruara nëpërmjet sistemit “UEFA BFDS” tani sugjerojnë për një skemë më të gjerë përfshirjeje nga KF Skënderbeu në manipulimin e ndeshjeve. Si rrjedhojë, UEFA tani do të kërkojë një dënim më të gjatë për klubin. Sot, Inspektorët e Disiplinës që po merren me çështjen, kanë marrë kërcënime anonime me vdekje, të cilat prezumohet se kanë si qëllim të frikësojnë ata dhe t’i ndalojnë të kryejnë punën e tyre. Këto kërcënime nuk do t’ia dalin dhe policia është informuar gjithashtu. UEFA mbetet plotësisht e përkushtuar për të luftuar kundër manipulimeve dhe i gjithë stafi i UEFA- s që punon në këto çështje thelbësore ka mbështetjen e plotë të organizatës. Ky mesazh u përsërit sot nga presidenti i UEFA- s, Aleksander Ceferin, i cili deklaroi: “Ne kurrë nuk do të lejojmë asnjëherë që stafi i UEFA- s që punon në këto çështje apo çështje të tjera, të bëhet subjekt i kërcënimeve apo frikësimeve nga palë të treta. Ata kanë mbështetjen e plotë të organizatës, përfshirë edhe mbështetjen 100% nga unë.”